Նիկոլ Փաշինյանն այսօր լրագրողների հետ ճեպազրույցում անեկդոտ պատմեց։
«Մի անեկդոտ կա՝ մեկը մյուսին հարցնում է՝ «Անունդ ի՞նչ է», ասում է՝ «Սպարտակ», «Ինչի դու ո՞ր թիվն ես»։ Հիմա էդ ո՞ր թվի հարց եք տալիս»,- ասաց նա ի պատասխան լրագրողի հետևյալ հարցի՝ արդյոք այսօր կարելի է փողոցներն անժամկետ փակել, ԱԺ-ում ծխարձակում անել, Ռադիոտան գույքը փչացնել, դատարանների ելքերն արգելափակել և ԱԺ շենքը շրջափակել։
«Ցանկացած բան, որն արտահայտում է ժողովրդի կամքը, թույլատրելի է։ Այն, ինչ չի արտահայտում ժողովրդի լեգիտիմ կամքը, թույլատրելի չէ»,-ասաց Փաշինյանը։
Հարցին՝ ինչպե՞ս է չափվում լեգիտիմ կամքը՝ նա պատասխանեց՝ 50+1 տոկոսով։
Դիտարկմանը, թե երբ իրենք էին անում հեղափոխություն, 7 տոկոս ձայն ունեին՝ Փաշինյանն արձագանքեց.
«Լավ, բա եթե ես 7 տոկոս ունեմ, ի՞նչ գործ ունեմ այստեղ Ձեր հարցերին պատասխանելիս։ Ես չէի խոսում տոկոս ունենալ-չունենալու մասին. ես խոսում էի ժողովրդի լեգիտիմ կամքի մասին։ Ժողովուրդն իր լեգիտիմ կամքը արտահայտելու ձև միշտ էլ կգտնի, եթե լեգիտիմ կամքը ձևավորված լինի։ Իմ՝ այստեղ գտնվելը ժողովրդի լեգիտիմ կամքի արտահայտությունն է։ Եթե ուրիշ լեգիտիմ կամք ձևավորվի, անպայման կարտահայտվի»,-ասաց նա։
