Միացյալ Նահանգների իշխանությունները 2021 թվականի սկզբին ամերիկացիներին կապահովեն կորոնավիրուսի նոր տեսակի դեմ պատվաստանյութով, որից հետո կսկսվեն ամերիկյան պատվաստանյութերի լայնածավալ մատակարարումներ աշխարհի այլ երկրներ: Այս մասին ազգին ուղղված իր ամանորյա ուղերձում հայտարարել է ԱՄՆ գործող նախագահ Դոնալդ Թրամփը:
Պետության ղեկավարի ուղերձը հրապարակվել է Twitter-ի նրա էջում:
«Այս տարվա սկզբին պատվաստանյութը հասանելի կլինի յուրաքանչյուր ամերիկացու, իսկ դրանից հետո այն կտարածվի ամբողջ աշխարհում»,- նշել է Թրամփը:
Ներկայում ԱՄՆ-ում թույլատրվում է կորոնավիրուսի դեմ երկու պատվաստանյութերի արտակարգ օգտագործումը, դրանցից մեկը մշակվել է Pfizer եւ BioNTech ընկերությունների, իսկ մյուսը` Moderna ընկերության կողմից:
ԱՄՆ-ը COVID-19 դեպքերի թվով առաջին տեղն է զբաղեցնում աշխարհում: Համավարակի ողջ ընթացքում ավելի քան 19 միլիոն ամերիկացիներ են վարակվել կորոնավիրուսով, նրանցից ավելի քան 340 000-ը մահացել են:
News.am
