ԱՄՆ պետքարտուղարությունն անդրադարձել է մայիսի 19-ին Մոսկվայում Հայաստանի և Ադրբեջանի արտաքին գործերի նախարարներ Արարատ Միրզոյանի և Ջեյհուն Բայրամովի, ինչպես նաև երկու երկրների ղեկավարների՝ Նիկոլ Փաշինյանի և Իլհամ Ալիևի՝ ՌԴ նախագահ Վլադիմիր Պուտինի մասնակցությամբ կայանալիք հանդիպումներին. համապատասխան մեկնաբանությունն արել է Պետքարտուղարության փոխխոսնակ Վեդանտ Պատելը:
«Մենք շարունակում ենք ապահովել Միացյալ Նահանգների լիակատար աջակցությունն ու ներգրավվածությունը մինչ այս երկու երկրներն աշխատում են կայուն և արժանապատիվ խաղաղություն ապահովելու համար: Մենք ողջունում ենք տեղեկություններն առ այն, որ կողմերը պատրաստվում են շարունակել ներգրավված մնալ այս քննարկումներում, և մենք վերահաստատում ենք մեր համոզմունքն առ այն, որ խաղաղությունը հասանելի է, և որ ուղիղ երկխոսությունն առանցքային է այս խնդիրների լուծման համար:
Մեր տեսակետն այն է, որ կողմերի միջև ուղիղ բանակցությունները չափազանց կարևոր են, և մենք ուրախ ենք տեսնել, որ դրանք կայանում են՝ անկախ նրանից, թե որտեղ են դրանք տեղի ունենում՝ Արլինգթոնում, Բրյուսելում, Մոսկվայում: Մեր աջակցությունն այս ջանքերով կշարունակվի», – ասել է Պատելը:
