Azg.am-ը ներկայացնում է Արցախի մեր գործընկերների պատրաստած տեսանյութը։
Արդեն շուրջ 1 ամիս Արցախում մնացած ծնողների ու Հայաստանում սպասող երեխաների զրույցը ավարտվում է անփոփոխ հարցով ու անորոշ պատասխանով: Սկզբում ժամերն էին հաշվում, հետո՝ օրերը: Միջանցքը շարունակում է փակ մնալ, բազմաթիվ ընտանիքներ՝ կիսված:
Բաղդասարյան ամուսինները դեկտեմբերի 11-ին Արցախ էին եկել բնակարանի հարցով: Ավետարանոց համայնքից տեղահանված ընտանիքը 2020 թվականի պատերազմից հետո ժամանակավորապես հաստատվել է Գյումրիում: Տուն էին ցանկանում ձեռք բերել, կրկին տեղափոխվել Արցախ, բայց միջանցքի փակումը անորոշ է դարձրել ամեն ինչ:
Այս պահին Ռոզան և Սամվելը կանգնած են նաև աշխատանքը կորցնելու վտանգի առաջ: Իրենք ևս հասկանում են, որ անընդհատ չեն կարող իրենց հաշվին արձակուրդ վերցնել․ օրենքն այլ պահանջներ ունի: Ու այս վիճակում, երբ ընտանիքը կերակրող ամուսինները շրջափակված Արցախում են, անորոշ է մնում անչափահաս երկու երեխաների կեցության հարցը:
Միջանցքը փակվելուց հետո ամուսինները ազգականի տանն էին մնում: Հետո կառավարության աջակցությամբ տեղափոխվել են Ստեփանակերտում գործող հյուրատներից մեկը: Աշխարհի անտարբերությունից է բողոքում Ռոզան:
Արցախում ԿԽՄԿ գրասենյակից տեղեկացրել են, որ կիսված ընտանիքների միավորման հարցը իրենց ուշադրության կենտրոնում է, և ըստ այդմ մշտական կապի մեջ են այդ ընտանիքների հետ: Ցանկացած մարդասիրական խնդրի կարգավորմամբ կարող են զբաղվել միայն բոլոր կողմերի համաձայնությամբ:
