ԱԺ արտաքին հարաբերությունների մշտական հանձնաժողովի նիստում «Հայաստան» խմբակցության հեղինակած Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագծի քննարկմանը «Պատիվ ունեմ» խմբակցության քարտուղար Հայկ Մամիջանյանն ասաց, որ ելույթ ունենալու իմաստ չի տեսնում։
«Նիստի ընթացքում անընդհատ հարց էր առաջանում՝ իսկ ի՞նչ մաստ ունի ելույթ ունենալ: Որոշումը կայացված է, նրանք, որոք չեն հասցրել, էսօր SMS-ով կամ որեւէ այլ կերպ կստանան, թե ինչպես քվեարկել: Բայց հետո հասկացա, որ ելույթ պետք է ունենալ, որ մեր համաքաղաքացիենրը տեղեկանան, թե հիմա ինչ է տեղի ունենում»,- նշեց նա։
Մամիջանյանը դիմեց ՔՊ խմբակցության պատգամավոր Գուրգեն Արսենյանին՝ նշելով. «Դուք հղում արեցիք 2013-ի համատեղ ստորագրած փաստաթղթին, եւ կապ գտաք 44-օրյա պատերազմում Թուրքիայի ներգրավվածության վերաբերյալ: Վստահ եմ՝ հիշում եք, որ 2016-ի քառօրյա պատերազմի շրջանակներում, Թուրքիան որպես ԵԱՀԿ Մինսկի խմբի անդամ երկիր, դատապարտել էր ուժի կիրառումը: Այնպես որ այդ զուգահեռները տեղին չեն:
Իսկ այս պահին տեղի է ունենում մի շատ պարզ բան. ՔՊ-ն բառացիորեն ասում է հետևալը՝ հանկարծ չնեռվայնացնենք, չջղայնացնենք թուրք-ադրբեջանական տանդեմին, մի անգամ պատասխանել ենք ԱԳՆ-ով, հազիվ չեն արձագանքել դրան, էլ մի հատ էլ այս հարցը մի բարձրացրեք։ Ասում են՝ ընդամենը վավերացում։ Ի՞նչ է նշանակում ընդամենը վավերացում։ Մենք պառլամենտական երկիր ենք։ Եթե ՔՊ-ն որոշել է, որ Հայաստանի Ազգային ժողովը պետք է մոմ բռնող լինի թուրք-ադրբեջանական սիրախաղի մեջ, մենք այդպես չենք համարում»,- ասաց ընդդիմադիր պատգամավորը։
Հայկ Մամիջանյանի խոսքով, միջազգային հարաբերություններում հնարավոր չէ ջայլամի քաղաքականություն վարել և չնկատել տեղի ունեցող գործընթացները. «Թուրքիայի օրենսդիրում Թուրքիայի փոխնախագահը պաշտոնական հայտարարում է, որ թուրքական հատուկ ծառայություններն ուղղակիորեն ներգրաված էին 44-օրյա պատերազմին, մենք ինչ ենք անում, ասում ենք՝ ինչ լավ է Թուրքիան հայտարարել է, որ առանց նախապայմանների է մեզ հետ հարաբերությունների կարգավորմանը գնալու։ Դրա առանց նախապայմաններինը ո՞րն է»,- ասաց «Պատիվ ունեմ» խմբակցության պատգամավորը։
Ավելի վաղ NEWS.am-ը հայտնել էր, որ այսօր՝ փետրվարի 21-ին ԱԺ արտաքին հարաբերությունների մշտական հանձնաժողովի նիստում քննարկվել է «Հայաստան» խմբակցության հեղինակած Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագիծը: Այդ նիստում ՔՊ խմբակցության անդամ Գուրգեն Արսենյանը հայտարարել էր, որ չեն միանա «Հայաստան» խմբակցության հայտարարության նախագծին։
News.am
