«Լուսավոր Հայաստան» կուսակցության նախագահ Էդմոն Մարուքյանը չգիտի՝ որտեղի՞ց ՀՀ երկրորդ նախագահ Ռոբերտ Քոչարյանին վստահություն, որ չի ընդունում իր առաջարկը և նախընտրում է ընտրություններին մեկ բևեռով գնալ։
«Ինքն ասում է՝ մենք մեր ուժով կգնանք։ Պատկերացնենք՝ մի հատ էլ են ընտրության մասնակցում՝ իրենց իմացած ձևերով, ու մի հատ էլ է Նիկոլ Փաշինյանն ընտրվում։ Դա կոմֆո՞րտ վիճակ է Քոչարյանի և մյուսների համա։ Եթե նույն սխալներն արվեն, ոնց որ 21 թվականին, էլի նույն բանն է լինելու», -FactorTV-ի եթերում ասաց Մարուքյանը։
«Լուսավոր Հայաստան» կուսակցության նախագահի խոսքով՝ ինչ կարգախոս էլ ընտրելու լինի ՔՊ-ն գալիք ընտրությունների համար՝ պատերազմ-խաղաղություն., ՌԴ-ԵՄ և այլն, բոլորն էլ կեղծ են լինելու։
Էդմոն Մարուքյանը միաժամանակ հերքեց իշխանական շրջանակների այն պնդումները, որ ստեղծման օրից իր ղեկավարած կուսակցությունը և ինքն անձամբ բազմաթիվ տրանսֆորմացիաների են ենթարկվել։
«Եթե աշխարհում մի ուժ կա, որ սկզբում մի բան ասել է, հետո հակառակն է արել, դա իրենք են։ Ստել են, մանիպուլացրել, ուրիշ բան արել։ Մենք միակ պրոեվրոպական ուժն ենք, որն իշխանությանը հակադիր է։
Այս իշխանությունը տապալել է բոլոր ռեֆորմները։ Կարող են Հայաստանը Թուրքմենստանի նման երկիր սարքել, ի՞նչ ԵՄ։ Իրենք խաբեբաների խմբեր են, իշխանությանը մի հավատացեք։ Իրենք ԵՄ տանելու, վիզաների ազատականացման հետ որևէ կապ չունեն»,-ասաց Մարուքյանը։
Նա միաժամանակ հավաստիացրեց, որ 2021 թվականի ընտրություններից օրեր անց ԱԺ նախկին փոխխոսնակ Ռուբեն Ռուբինյանն իրեն է փոխանցել Նիկոլ Փաշինյանի առաջարկը՝ դառնալ Բարձր տեխնոլոգիական արդյունաբերության նախարար։ Ինքն առաջարկը մերժել է, քանի որ իրեն չի տեսել այդ պաշտոնում, համարել է, որ իրավաբան լինելով՝ ինքն այդ ոլորտում անելիք չունի։
Ավելի ուշ նույն Ռուբեն Ռուբինյանը փոխանցել է Նիկոլ Փաշինյանի առաջարկը՝ արդեն Ադրբեջանի հետ բանակցությունների փուլում ներգրավվել հայկական նարատիվների պաշտպանության գործում՝ որպես իրավաբան։
Ըստ Մարուքյանի՝ ինքը և Եղիշե Կիրակոսյանը բավական մեծ աշխատանք են տարել խաղաղության պայմանագրի իրավական կարգավորումների մասով։
