Լեհաստանը Գդանսկում փակում է Ռուսաստանի հյուպատոսությունը երկաթգծի վրա իրականացված դիվերսիայից հետո: Ինչպես «Արմենպրես»-ը տեղեկանում է BBC-ի ռուսական ծառայությունից, այս մասին հայտարարել է Լեհաստանի արտաքին գործերի նախարար Ռադոսլավ Սիկորսկին:
Նրա խոսքով՝ ինքը նման քայլի մասին Ռուսաստանին նախազգուշացրել է դեռևս մայիսին, երբ հետաքննությունը պարզեց ռուսական հատուկ ծառայությունների մասնակցությունը Վարշավայի շուկայի հրկիզման մեջ: Այն ժամանակ փակվեց Կրակովի հյուպատոսությունը:
«Ես այն ժամանակ հայտարարել եմ, որ հետագա որոշումներ կընդունեմ, եթե Ռուսաստանը չդադարեցնի իր դիվերսիոն գրոհները Լեհաստանի վրա: Ռուսաստանը դա չի արել, և հարձակումները սաստկանում են: Երբ լրտեսության և դիվերսիոն գործունեության նպատակը մարդկային զոհերն են, ապա մենք գործ ունենք ոչ թե դիվերսիայի, այլ պետական ահաբեկչության հետ: Ուստի, և սա մեր ամբողջական պատասխանը չի լինի, ես որոշել եմ հետ կանչել Գդանսկում Ռուսաստանի վերջին հյուպատոսության գործունեության վերաբերյալ թույլտվությունը», – Սիկորսկու հայտարարությունը մեջբերել է RMF24 ռադիոն:
Նոյեմբերի 18-ին Լեհաստանի իշխանությունները հայտարարել էին, որ կարծում են, թե ռուսական ծառայություններն առնչություն ունեն դեպի Ուկրաինա տանող Վարշավա-Լյուբլին երկաթգծի վրա կատարված երկու դիվերսիոն գործողությունների հետ: Հետաքննությունը կարծում է, որ դիվերսանտների նպատակը եղել է երկաթուղային աղետ առաջացնելը:
Գդանսկի հյուպատոսությունը Լեհաստանում Ռուսաստանի վերջին դիվանագիտական ներկայացուցչությունն էր մնացել, չհաշված դեսպանատունը Վարշավայում։ Սիկորսկին հստակեցրել է, որ Լեհաստանը չի պատրաստվում խզել Ռուսաստանի հետ դիվանագիտական հարաբերությունները։
