ՀՀ պաշտպանության նախարարությունում ամերիկյան բանակի ներկայացուցչի աշխատանքի ռազմական ասպեկտն անհասկանալի է, որովհետև անհայտ է, թե վերջինս ինչով է զբաղվելու։ Հարց է, թե այդ անձի ներկայությունը որքանով կարող է ազդել ռազմական կարողությունների և հնարավորությունների վրա։ Azg.am-ի թղթակցի հետ զրույցում նման տեսակետ հայտնեց քաղաքագետ Դավիթ Հարությունովը՝ անդրադառնալով ԱՄՆ պետքարտուղարի տեղակալ Ըզրա Զեյայի հավաստիացմանը, որ Հայաստանի Պաշտպանության նախարարությունում ամերիկյան բանակի ներկայացուցիչ կաշխատի։
«Օրինակ՝ մենք գիտենք, որ Ֆրանսիայի հետ համագործակցության շրջանակներում խոսք է գնում ՀՕՊ համակարգի աուդիտի, կոնկրետ այլ ոլորտների մասին։ ԱՄՆ-ի դեպքում իրավիճակն անհասկանալի է։ Իհարկե, վերջին 20 տարիների ընթացքում Հայաստանը ռազմական ոլորտում համագործակցել է Միացյալ Նահանգների հետ։
Այդ համագործակցությունը հիմնականում կենտրոնացած է եղել ոլորտների վրա, որոնք ռազմական կարողությունների վրա անմիջական ազդեցություն չեն ունեցել՝ համագործակցություն խաղաղապահ բրիգադի հետ, Կանզասի գվարդիայի հետ համագործակցություն, ՊՆ-ի կառուցվածքային բարեփոխումների աջակցում և այլն»,- հիշեցրեց մեր զրուցակիցը՝ հավելելով, որ եթե ամերիկացի պաշտոնյան ՊՆ-ում զբաղվելու է այսօրինակ հարցերով, նրա նշանակումը հեղափոխական չպետք է դիտարկել։
Դավիթ Հարությունովի խոսքով՝ ՊՆ-ում ամերիկացի բանակայինի ներկայությունը ևս մեկ ցուցիչ է, որ Հայաստանի ղեկավարությունը ռազմական-անվտանգային ոլորտում փոխում է կողմնորոշումը, Ռուսաստանից գնում դեպի Արևմուտք։
Քաղաքագետը միաժամանակ շեշտեց՝ եթե անգամ կուրսի փոփոխությունն ինչ-որ պահի բարեհաջող ընթացք ստանա, բանակը, միևնույն է, նստած է լինելու երկու աթոռի վրա։ Պատճառն այն է, որ ՀՀ ԶՈՒ-երը բավական մեծ կապվածություն ունեն Ռուսաստանի հետ՝ ռազմական տեխնիկայի, որոշ զինատեսակների սպասարկման, ռազմաուսումնական հաստատությունների մասով։
«Անհասկանալի է նաև, թե ինչ է լինելու հակաօդային պաշտպանության ոլորտում համագործակցության հետ, որովհետև հայտնի է, որ ռուսական 102-րդ ռազմաբազայի հիմնական ուղղությունը հենց հակաօդային պաշտպանությունն է։
Անհասկանալի է, թե հայկական կողմն ինչպես է կազմակերպելու արևմտյան և ռուսական տարրերի սինթեզը կամ կարողանալու է առհասարակ կազմակերպել։ Խնդիրն այն է, որ այս սինթեզը տեղի է ունենում մաքսիմալ լարված պայմաններում՝ հաշվի առնելով Արևմուտքի և Ռուսաստանի հարաբերությունները»,- ամփոփեց Դավիթ Հարությունովը՝ միաժամանակ ընդգծելով, որ գործընթացների առնչությամբ պաշտոնական Մոսկվայի արձագանքն առայժմ հայտարարությունների մակարդակում է, և կարելի է կարծել, որ Հայաստանի հանդեպ կոշտ պատժամիջոցներ չեն կիրառվի։
