Քաղաքագետ Արա Պողոսյանի համոզմամբ՝ Հայաստանի Հանրապետությունը, որպես պետություն, գործող իշխանությունների առաջնորդությամբ սպառել է բոլոր տեսակի գործիքները և գերիների վերադարձի հարցում այս պահին որևէ արմատական լուծում չի կարող հետապնդել։ Ստեղծված իրավիճակում, ըստ Պողոսյանի, գերիների հետվերադարձի միակ հույսը հայկական սփյուռքն է։
«Հաճախ տեսակետ է հնչում, որ եթե Ադրբեջանը բաց չիթողնում հայ ռազմագերիներին, պետք է դադարեցնել բանակցությունները։ Բայց հանգամանքը դիտարկենք այլ դիտանկյունից. իսկ կարո՞ղ են ՀՀ իշխանությունները դադարեցնել բանակցությունները կամ եթե դադարեցնեն, դա ի՞նչ հետևանքների կհանգեցնի։
Իսկ ՀՀ իշխանություններն այս հինգ տարվա ընթացքում արդյոք կառուցել են դիմադրունակ պետություն, արդյոք վերակազմավորել և վերազինել են ՀՀ անվտանգության հիմնական երաշխավոր հանդիսացող բանակը, թե տապալել են գործընթացը և այժմ խայտառակ կեցվածք որդեգրելով՝ իրենք իրենք իրենց դրել են վատագույն կարգավիճակում»,- Azg.am-ի թղթակցի հետ զրույցում ասաց Արա Պողոսյանը։
Ըստ քաղաքագետի՝ ՀՀ իշխանությունների վարքագիծը և քաղաքական խոսույթն են հանգեցրել այն վիճակին, որ Հայաստանի Հանրապետությունը ռազմագերիների վերադարձի հարցով դարձել է անգործունակ։
«Եթե մի փոքր կոպիտ բառ օգտագործենք՝ իմպոտենտ»,- ասաց մեր զրուցակիցը։
Անդրադառնալով գերիների հարցով ԱԳՆ-ի տարածած այսօրվա հաղորդագրությանը՝ Արա Պողոսյանը նկատեց՝ այն պետք է դիտարկել ընդամենը որպես «գալչկա»՝ ոչ ավելին։
«Հենց իրենք էլ հասկանում են, որ դրանով խնդիր չի լուծվում։ Ընդ որում՝ 2022-2023 թվականներին մարդու իրավունքների հետ կապված քանի՞ դատական միջազգային հայցեր եղան, որոնց արդյունքում Ադրբեջանի նկատմամբ որոշումներ կայացվեցին, բանաձևեր ընդունվեցին։ Բայց դրանցից քանի՞սն Ադրբեջանի կողմից կատարվեցին. վստահաբար կարող եմ պնդել, որ որևէ մեկը չի կատարվել։
Հետևաբար այս պայմաններում նույնիսկ միջազգային ատյաններին դիմելու գործընթացն է շատ մշուշոտ՝ հաշվի առնելով նաև այն հանգամանքը, որ ՀՀ իշխանությունները համաձայնել են հետ կանչել Ադրբեջանի դեմ արդեն իսկ հարուցված գործերը։ Կարծում եմ՝ այս ամենը պետք է դիտել որպես համալիր գործընթաց։
Իսկ գերիների վերադարձի հարցի լուծումը ես տեսնում եմ ոչ այնքան ՀՀ այսօրվա գործողությունների մեջ, որքան սփյուռքի՝ որպես միջազգային հարաբերությունների նոր իրավաքաղաքական սուբյեկտ դառնալու և Հայաստանից առանձին այս մասով ճնշման գործիքներ գտնելու։ Իսկ այդ ճնշման գործիքն Ադրբեջանի վրա ազդելն է թե՛ իրենց պետությունների իշխանությունների միջոցով, թե՛ տարբեր հնարքներով, որովհետև ստացվել է այնպես, որ այս պահին հայկական սփյուռքը կարող է դառնալ շատ ավելի գործունակ իրավաքաղաքական սուբյեկտ դառնալ, քան Հայաստանի Հանրապետությունը»,- ամփոփեց մեր զրուցակիցը։
Հիշեցնենք, որ ՀՀ ԱԳՆ-ն հայտարարություն է տարածել, որում անդրադարձել է Բաքվի բանտերում ապօրինի պահվող հայ գերիների հարցին։
«Խորը մտահոգություն են պատճառում հայազգի ռազմագերիներից, պատանդներից, այլ պահվող անձանցից 23-ի նկատմամբ «դատավարություններից» տեսաձայնագրություններ և լուսանկարներ ներառող հրապարակումները, նշյալ անձանց` ներառյալ հացադուլի մեջ գտնվող Ռուբեն Վարդանյանի փաստաբանների կողմից հրապարակայնացվող տեղեկությունները՝ կալանավորված անձանց նկատմամբ ներգործության, խոշտանգումների և նրանց առողջական վիճակի ակնհայտ վատթարացման մասին»,- նշված է հայտարարության տեքստում։
