Իրանցիները կրկին բողոքի ցույց են անցկացնում Երևանում Իրանի դեսպանատան առջև: Ակցիայի մասնակիցները ցանկանում են երթով դեպի Կապույտ մզկիթ շարժվել, սակայն տարածքում գտնվող մեծ թվով ոստիկանները թույլ չեն տալիս, ցուցարարները նստացույց են սկսել։
ՆԳՆ խոսնակ Նարեկ Սարգսյանը, մեկնաբանելով կատարվողը, նշել է․ «Երթն արտոնված չէ, այդ իսկ պատճառով արգելվել է երթի իրականացումը, ինչպես նաև հավաքի ընթացքում 7 անձ «Վարչական իրավախախտումների վերաբերյալ» օրենսգրքի 182-րդ հոդվածով (Ոստիկանության ծառայողի օրինական պահանջը չկատարելը) նախատեսված արարք կատարելու համար ենթարկվել են վարչական ձերբակալման»։
Հայաստանում ապրող իրանցիներն ու իրանահայերն այսօր բողոքում են Իրանում ցուցարարների սպանություններից, նաև կրոնական իշխանության փոխարեն աշխարհիկ իշխանություն պահանջում:
Ցուցարարները վրդովված պնդում են, թե ցույցն ու երթը հունվարի 15-ի որոշմամբ արտոնվել է քաղաքապետարանի կողմից, բայց երեկ երթի մասը չեղարկվել է՝ Իրանի դեսպանի «սպառնալիքներից» հետո:
