Պապ…
Առաջին ծնունդդ առանց քեզ. շնորհավոր մեզ, որ քեզ ունեցել ենք, որ աշխարհի լավագույն հայրը, ընկերը, խորհրդատուն, ուսուցիչը, հրամանատարը հենց մեզ է բաժին հասել, ու ամենօրյա ռեժիմով մեզ հետ է եղել…
Տունս, հանգիստս կորցրել եմ, փնտրում եմ քեզ ամեն տեղ, բայց չեմ գտնում հոգիս լցնող ներկայությունդ…
Ծնունդիցդ ընդամենը 3 օր հետո ստացվում է, որ արդեն կես տարի է կյանքը մեզ բաժանել է…
Ե՞րբ ու ո՞նց անցավ այս կես տարին. չգիտեմ։ Ինչքա՞ն փոխեց ինձ ու բոլորիս այս կես տարին. չգիտեմ։
Ես 6 ամսում հազիվ սովորեցի սեփական բերանով ասել, որ դու էլ չկաս, չսովորեցի գիտակցել դա, չսովորեցի չհուզվել ամեն վայրկյան, երբ պակասդ զգացի, կամ զգացի, որ քեզ այսինչ բանը դուր կգար, պապ, անհնար է սովորել չլինելուդ…
Հախվերդյանի «Ես սպասում եմ քեզ, Հայրիկ» երգից մի արտահայտություն է անդադար պտտվում՝ այդ նրա ուժեղ ձեռքերն են բարձրացնում քեզ դեպի վեր… Քո ուժեղ ձեռքերն են ինձ պահում հիմա չկոտրվելուց ու չփլվելուց…
Հայր, որը հավերժ բոլորիս թիկունքն եղավ ու բոլորիս ուժ տվեց թե՛ ապրելու, թե/ հավատալու ինքդ քեզ, թե՛ սիրելու այս երկիր-հայրենիքը…
Մի ուրիշ հպարտություն է քեզնից հետո լսել, որ քեզ նման եմ, որ կարողանում եմ խոսքս ճիշտ քեզ պես դասավորել (չնայած ես չեմ հավատում, որ կկարողանամ հասնել քեզ երբևէ)։
Շնորհակալ եմ քեզ, պատկերացումներիս լավագույն հայրը լինելու համար, ով կյանքի բոլոր իրավիճակներում կողքիս ամուր կանգնած էր ու երբեք ձեռքս բաց չէր թողնում…
Շնորհակալ եմ ինձ, որ հասցրել եմ քեզ ճանաչել, քո գինն ու կարևորությունը հասկանալ, երբ դու դեռ կողքիս էիր…
Երբեք այսքան շատ չեմ գրել, երևի քեզ հետ խոսելու բացն է ստիպում գրել, երանի՜ գրկել լիներ քեզ…
Անհամբեր կսպասեմ մեր հանդիպմանն ամբողջ կյանքիս ընթացքում…
Հ.Գ. Շնորհակալ եմ, որ այս նկարի մեջ եղած ճամփորդությունն ունեցա հետդ։ Երբ տոմսերս գնում էի, ասսաց՝ 3 անգամ Իտալիայում եղել եմ, Հռոմում չեմ եղել, ու ես ասեցի՝ էլ ոչինչ մի ասա, մի օրով Հռոմ ենք գնում.. Անմարդկային շատ սիրում եմ այս օրերը։
Հ.Գ. Բոլոր ճանապարհներս քեզ մոտ են բերում, բոլոր անպատասխան հարցերս քո գիրկն են փնտրում, բոլոր կոտրվածքներս քո սիրով են բուժվում…
Երջանկահիշատակ Գագիկ Գինոսյանի դստեր՝ Ծովինար Գինոսյանի նամակը՝ հոր ծննդյան օրվա առիթով
Այսօր Գագիկ Գինոսյանը կդառնար 58 տարեկան
