Սրբուհի Գալյանի համար սպասելի չէր, որ «Քաղաքացիական պայմանագիր» կուսակցությունն ի վերջո իրեն կառաջադրի Արդարադատության նախարարի պաշտոնում։ Կառավարության նիստից հետո լրագրողների հետ զրույցի ժամանակ այս մասին ասաց ինքը՝ նորանշանակ նախարարը։
«Ես զբաղեցնում էի այլ պաշտոն, բայց առաջարկը ստանալուց հետո մտածել եմ և տվել եմ իմ գիտակցված համաձայնությունը։ Նախկինում այդ բեռը ստանձնած եղել եմ, երբ հեղափոխությունից հետո զբաղեցրել եմ ՀՀ արդարադատության փոխնախարարի պաշտոնը, և այդ պատասխանատվության գիտակցումը պայմանավորել է իմ համաձայնությունը»,-ասաց նա։
Հարցին՝ մտավախություն չունի՞, որ մի օր էլ ՔՊ-ական պատգամավորներն իր դեմ ստորագրահավաք կսկսեն և կստիպեն հրաժարական տալ, Գալյանը պատասխանեց՝ գործադիր մարմնում աշխատող մարդու գործը պետք է լինի գործ անելը. մտահոգություններ ունենալը տեղին չէ:
Արդարադատության նախարարի հիմնական անելիքը, ըստ նորանշանակ պաշտոնյայի, քաղաքական մակարդակում արդարության հարցի ճիշտ հասցեագրումն է, երկրորդը՝ արդարադատության համակարգի կայուն ու միասնական չափանիշների վրա հիմնված զարգացումը։
«Այս երկու կոմպոնենտի պահպանմամբ կփորձենք վեր հանել խնդիրները, հասկանալու, թե որտեղ է արդարության պակասի զգացումը ձևավորվում մեր քաղաքացիների մոտ»,- ասաց արդարադատության նախարարը:
