Բնականաբար, պատրաստվելու ենք պայքարի. նույնը խորհուրդ ենք տալիս մեր քաղաքացիներին։ Այս մասին մարտի 12-ին, իր տեսաուղերձում նշել է «Մայր Հայաստան» շարժման համակարգող Անդրանիկ Թևանյանը՝ խոսելով Երևանում տրանսպորտի թանկացման հետևանքների մասին։
«Պատկերացնու՞մ եք, թե սրա արդյունքում ինչ է սպասվում Երևանին։ Երեւանում մարդիկ արդեն կնախընտրեն չօգտվել տրանսպորտից: Քաղաքում մեքենաների թիվը կավելանա, քանի որ մեքենաների սեփականատերերը կնախընտրեն տեղաշարժվել մեքենայով, և այս դեպքում մենք ոչ միայն չենք բեռնաթափի քաղաքը, այլ կստանանք ծանրաբեռնվածություն հատկապես քաղաքի կենտրոնում և ընդհանրապես Երևանում։
Տրանսպորտի գները բարձրացնում են առանց հաշվարկների, առանց հիմնավորման։ Ցույց տվեցինք սուբսիդավորման տեղերը, ասացինք, որ «ստվերը» նվազեցնելով կարելի է դա անել։
Մենք ներկայացրել ենք մեր սեփական նախագիծը՝ «Մայր Հայաստանի» նախագիծը, որը օրակարգում չի եղել, բայց իրենց նախագիծը շատ հրատապ ներկայացվել է ավագանու նիստում»,- ասաց Թևանյանը։
Քաղաքական գործչի կարծիքով՝ այս թանկացումները փաստացի լրացուցիչ բեռ կդառնան երեւանցիների համար։
Նա նաեւ մեղադրեց իշխանություններին բառիս բուն իմաստով գիշատիչ նախագիծ իրականացնելու մեջ։
«Մայր Հայաստանը» դատապարտում է այս որոշումը։ Բնականաբար, պատրաստվելու ենք մայքարի: Նույնը խորհուրդ ենք տալիս մեր քաղաքացիներին։
Եվ մենք ասում ենք, որ պետք է պատրաստվել մինչև սեպտեմբերի 1-ը։ Մեր առաջին կոչը լինելու է, որ մարդիկ պարզապես բոյկոտեն և չվճարեն այս մեծ գումարները։ Իսկ եթե ամեն տեղ 100 դրամ վճարեն, ոչինչ չեն կարող անել»,- ասաց Թևանյանը։
Ըստ նրա՝ սա սոցիալական, քաղաքական, բարոյական խնդիր է։
«Եվ ուզում եմ հիշեցնել, որ ՔՊ-ի, անձամբ Նիկոլ Փաշինյանի ու փոքրիկ Նիկոլ Փաշինյանների խաբեությունն ամենուր է։ Խոստացան խաղաղություն, բայց բերեցին պատերազմ, խոստացան Արցախի ինքնորոշման իրավունքը, բայց Արցախը ճանաչեցին որպես Ադրբեջանի մաս և նպաստեցին Արցախի էթնիկ զտմանը, խոստացան, որ ռազմավարական դաշնակիցների հետ հարաբերությունները կլինեն փայլուն, և այսօր մեզ ներքաշեցին պատերազմի մեջ և դարձրեցին մանրադրամ երրորդ կողմերի ձեռքում: Հայաստանը վերածում են երկրորդ Ուկրաինայի՝ ապահովելով մեզ համար շատ տխուր ապագա։
Նրանք խոստացան սեր և հանդուրժողականություն, բայց բերեցին ատելություն և պառակտում:
Ասացին, որ ապագա կա, բայց պարզվում է, որ անվտանգության տեսանկյունից ընդհանրապես ապագա չկա, քանի որ Հայաստանը թելից կախված է, իսկ ապագան, որ բերում են, իրականում թանկ ապագա է, որը անհարմարավետություն է պատճառում քաղաքացիներին:
Մեզ համար այս ամենն անընդունելի է, և մենք բոլորս պետք է պայքարենք ընդհանուր ջանքերով, մեր հասարակության հետ միասին պետք է պատրաստվենք և՛ թանկացումները կանխելու, և՛ ամբողջական իշխանափոխություն իրականացնելու համար»,- հավելեց Թևանյանը։
