Ադրբեջանցիները վստահեցրել են, որ Հայաստան գալու հետ կապված որևէ խնդիր չունեն, լրագրողների հետ զրույցում հայտարարեց ԱԺ նախագահ Ալեն Սիմոնյանը։
«Երևանում Եվրանեսթ խորհրդարանական վեհաժողովի 12-րդ հերթական նստաշրջանին նրանց չմասնակցելը պայմանավորված է զուտ այդ կազմակերպության հետ հարաբերություններով։ Իրենք որևէ խնդիր չեն տեսնում մեր համագործակցության ու փոխադարձ այցերի հետ կապված»,- ասաց նա։
Սիմոնյանի խոսքով՝ Հայաստանն ակնկալում է, որ բոլոր այն երկրները, որոնք մշտապես մասնակցել են Եվրոպական քաղաքական համայնքի գագաթնաժողովին, Երևանում նույնպես կմասնակցեն։
«Հարգելի՛ ժողովուրդ, պատրաստ եղեք, ադրբեջանական պատվիրակություններն այցելելու են Հայաստան, հայկական պատվիրակություններն՝ Ադրբեջան։ Իհարկե, կան հարցեր, որոնք պետք է քննարկվեն, մասնավորապես, գերիների, պահվող անձանց հարցը, բայց, այնուամենայնիվ, շփումները շարունակվելու են, ու մենք դրանք խորացնելու ենք»,- ասաց ԱԺ նախագահը։
Սիմոնյանը հույս ունի, որ Ալիևն ու Էրդողանը կգան Հայաստան։
«Մենք էլ ամեն ինչ կանենք, որ իրենց համար այստեղ հանգիստ լինի»,- ընդգծեց նա։
