Ադրբեջանի ԱԳ նախարարը, Ռոբերտ Քոչարյանը, Սերժ Սարգսյանը և Լևոն Տեր-Պետրոսյանը սխալ են ասում. Հայաստանը պատերազմ չի հրահրել , Հայաստանը պատերազմ չի սկսել, Հայաստանը չի դադարեցրել բանակցային գործընթացը։ Ես համաձայն չեմ Ջեյհուն Բայրամովի, Քոչարյանի, Սարգսյանի և Տեր-Պետրոսյանի հետ, լրագրողների հետ զրույցում այսօր ասաց ԱԺ փոխխոսնակ Ռուբեն Ռուբինյանը։
Հիշեցնենք, որ 44-օրյա պատերազմի հինգերորդ տարելիցին նվիրված ֆիլմում Ադրբեջանի արտգործնախարարը մի շարք մանրամասներ էր ներկայացրել նախապատերազմյան և հետպատերազմյան իրադարձությունների մասին՝ ըստ էության մեղադրելով Հայաստանին՝ բանակցային գործընթացից հրաժարվելու և սադրիչ քայլերով պատերազմ հրահրելու համար։
Ծավալուն ֆիլմում Ջեյհուն Բայրամովը պատմել էր, թե ինչպես է սկզբում կառուցողական մոտեցում որդեգրած Փաշինյանը կես տարի անց մերժել լուծել Ղարաբաղյան խնդիրը։
Ռուբեն Ռուբինյանը համաձայն չէ վերոնշյալ անձանց ներկայացրած փաստերի հետ, քանի որ դրանք, նրա խոսքով, ճիշտ փաստեր չեն։
«2019-ին չի եղել առաջարկ, որին Ադրբեջանը համաձայնել է, իսկ Հայաստանը չի համաձայնել։ 2008 թվականից սկսած, երբ ընդունվեցին Մադրիդյան սկզբուքնները, բոլոր առաջարկները նույն էության մեջ են եղել։ Տեր- Պետրոսյանը շատ լավ նշել է, թե ինչ են նշանակում Մադրիդյան սկզբունքները. նշանակում են ԼՂ ինքնորոշում Ադրբեջանի կազմում։
2019 թվականի առաջարկն սկսում է հետևյալով. «Ադրբեջանի նախագահը և Հայաստանի նախագահը»։ Այդ ժամանակ ՀՀ նախագահը Նիկոլ Փաշինյանը չէր, Արմեն Սարգսյանն էր, և Սարգսյանը չէր վարում բանակցություներ, հետևաբար 2019-ի փաստաթուղթը եղել է Սերժ Սարգսյանի նախագահության ավարտի դրությամբ ինչ-որ հանրագումար։ Հայաստանը որևէ առաջարկ չի մերժել»,-ասաց Ռուբինյանը։
