Ադրբեջանում և Հայաստանում ստեղծված պետական սահմանի սահմանազատման հանձնաժողովներն առ այսօր արդեն 7 հանդիպում են անցկացրել. հայտնել են Ադրբեջանի փոխվարչապետ Շահին Մուստաֆաևի գրասենյակից։
Հաղորդագրության մեջ ասվում է. «Այս փուլում հանձնաժողովների գործունեության շրջանակում աշխատանքներ են տարվում սահմանազատում իրականացմանն անհրաժեշտ կարգավորիչ դաշտ ստեղծելու ուղղությամբ։
Վերջերս հայկական ԶԼՄ-ներում ակտիվորեն կեղծ տեղեկություններ են տարածվում այն մասին, որ Հայաստանի 31 գյուղերին պատկանող հողերը իբր գտնվում են Ադրբեջանի «օկուպացիայի» տակ։ Նշվում է, որ Ադրբեջանը, չընդունելով դա, պահանջում է ազատագրել իր 4 օկուպացված գյուղերը։
Այս առնչությամբ ադրբեջանական կողմը հարկ է համարում նշել, որ մինչ պետական սահմանի սահմանազատումն իրականացվելը, միանգամայն անհիմն է հայտարարել, որ Հայաստանի 31 գյուղերին պատկանող հողերը «օկուպացված են»։
Ինչ վերաբերում է Հայաստանի կողմից օկուպացված 4 ադրբեջանական գյուղերին (Բագանիս Այրիմ, Աշաղի Ասքիպարա, Խեյրիմլի և Գըզըլգաջիլի), ապա դրանց պատկանելությունը Ադրբեջանին անվիճելի է, և դրանք ենթակա են անհապաղ ազատման։
Սահմանազատման գործընթացի շրջանակում կլուծվի նաև Հայաստանի կողմից օկուպացված Ադրբեջանի էքսկլավային 4 գյուղերի՝ Յուխարի Ասկիպարայի, Սոֆուլուի, Բարխուդարլիի և Քարքիի ազատագրման հարցը»։
Ինչպես տեսնում ենք, Ադրբեջանի պաշտոնական գրասենյակից մեկ օրվա ընթացքում նույն հարցի առնչությամբ 2-րդ հաղորդագրությունն է տարածվում՝ ավելի ագրեսիվ, ավելի հավակնոտ ու ավելի ցինիկ։
