Ճապոնական «Ձեն-օն մյուզիք» երաժշտական հրատարակչությունը վերջերս անգլերենից ճապոներեն թարգմանությամբ լույս է ընծայել Դանիել Ժաֆեի «Խաչատրյանական հետազոտություններ. ուղեցույց կատարողների եւ ծրագրողների համար» 33 էջանոց գրքույկը: Այն ներառում է ներածություն, Արամ Խաչատրյանի կենսագրությունը, համերգային ծրագրավորման նպատակով կոմպոզիտորի տարբեր ստեղծագործությունների (սիմֆոնիաներ, կոնցերտներ, բալետներ եւ սյուիտներ, կինոերաժշտություն, ձայնի, դաշնամուրի, կամերային եւ այլն) ուղեցույց:
Դանիել Ժաֆեն Բի Բի Սի հեռուստաընկերության «Երաժշտական հանդեսի» մշտական աշխատակից է, անգլիական եւ ռուսական երաժշտության մասնագետ: Հեղինակ է Սերգեյ Պրոկոֆեւի մասին մենագրության եւ «Ռուսական երաժշտության պատմական բառարանի»: Խաչատրյանական ուղեցույցի հրատարակությունն իրականացրել է կոմպոզիտորի ընտանիքի եւ Երեւանի Արամ Խաչատրյանի տուն-թանգարանի աջակցությամբ:
Վստահ ենք, որ սույն ուղեցույցն է՛լ ավելի կնպաստի հայ մեծ կոմպոզիտորի ստեղծագործության տարածմանը Ծագող արեւի երկրում:
Ա. Բ.
