Մարտի 4-ին,Երեւանի «Gala Art» ցուցասրահում բացվեց «Լույս եւ Կյանք» խորագիրը կրող ցուցահանդես-վաճառքը: Նախքան ցուցահանդեսին անցնելը` անդրադառնանք ցուցասրահի պատմությանն ու գործունեությանը: «Gala Art»-ն արդեն շուրջ տասը տարի իր հարկի տակ հյուրընկալելով բազմաթիվ արվեստագետների՝ հանրությանը ներկայացնում է ինչպես ճանաչված, այնպես էլ ծագող արվեստագետների, որոնք ստեղծագործում են Հայաստանում եւ նրա սահմաններից դուրս: Սակայն ցուցասրահի գործունեությունն սկսվել է դեռեւս 2000-ին: Ավագ սերնդի ընթերցողները գուցե հիշեն Թումանյան փողոցի վրա գտնվող «Բաքոս» ցուցասրահ-ռեստորանը, որն առաջիններից մեկն էր, եթե ոչ առաջինը, որ այդօրինակ կերպով փորձեց հանրությանը մոտ բերել արվեստին:
Այսպիսով, մարտի 4-ին ցուցասրահի երկու հարկերում կայացավ երկու անհատական ցուցադրություն, որոնցում ներկայացված էին Հարություն Հարությունյանի եւ Արծրուն Ասատրյանի աշխատանքները:
Ինքնին ցուցադրության անունը շատ ճշգրիտ է ընտրված: Ցուցադրված աշխատանքներն անդրադառնում են լույսին ու կյանքին՝ ավելի քան զուտ տեխնիկական առումներով:
Հարություն Հարությունյանն ավագ սերնդի նկարիչ է: Ստեղծագործություններում գերակայում է աբստրակտ եւ կուբիստական ուղղվածությունը: Նախընտրում է աշխատել վառ գույներով, հիմնականում՝ դեղինի երանգներով: Նա իր նկարներում մարդկանց առօրյան օծում է վառվռունությամբ, որսում է այն պահը, որն այդ իրադարձությունների մեջ թերեւս ամենակարեւորն է: Ստեղծագործությունները, անկախ պատկերից, հարմոնիկ են, ազնիվ:
Արծրուն Ասատրյանը նկարիչների նոր սերնդից է: Ստեղծագործությունները կուբիստական են, գույներն՝ ավելի պասիվ, հիմնականում՝ կապույտի երանգներով: Ստեղծագործություններում արված լուծումները հետաքրքրական են. որոշ կտավներում երկրաչափական ճառագայթներ, ստվերներ ու ամպեր են, մյուսներում երկրաչափական է միայն ֆոնը, դիտորդն իր առաջ հստակ դիմանկար է տեսնում: Նկարիչը ստանդարտ թեմաներին տալիս է յուրօրինակ պատկերում:
«Gala Art» ցուցասրահն այսօրինակ ցուցադրությունների շարք է կազմակերպել, եւ արդեն ապրիլ ամսին հանրությանը կներկայացնի նոր ցուցադրություն:
ՀՐԱՉՅԱ ԳԱԼՍՏՅԱՆ
