Ես տեսել եմ, թե ինչպես են արվեստի բազմաթիվ սիրահարներ Գերմանիայում պտտվում նրա նկարների, գույների՝ հատկապես վառ դեղինի, համարձակ կարմիրի ցոլարձակ գգվանքի շուրջ, տեսել եմ, թե ինչպես են ցուցասրահում երկար կանգ առնում որսալու նրա խոհը, անշարժ սեւեռումով գտանելու՝ պլաստիկական սինթեզի «միջոցով» աշխարհի հետ զրույց ծավալող նրա հղացած անզուգական նորարար առարկաների մեջ արվեստի աշխարհն իրենց շաղկապող թելը: Տեսել եմ, թե ինչպես են շոյել նրա մատների տակ շունչ առած կավը, որ խեցեգործության հրաշալի նմուշ է դարձել…
Տեսիլքների եւ երազների լուսեղեն պատկերներ որոնող, իրականի եւ տիեզերականի գունաբաժանը տեսանող, ու մեր ընկալումը ազգայինի ու համամարդկայինի ամբողջականության հասցնող վարպետը՝ Վան Սողոմոնյանը հունիսի 5-ին հրաժեշտ տվեց այս աշխարհին:
Ուր ներկա էր լինում, հագեցնում էր միջավայրը. Թիֆլիսյան առոգանությամբ նրա հայոց լեզուն, լայնեզր գլխարկը, պարթեւ հասակը տարաշխարհիկ ձգողականություն էր ստեղծում: Այդ մագնիսը աշխարհի բազմաթիվ թանգարաններում ցուցադրվող նրա ձեռքի ու մտքի ստեղծածի մեջ, բարեբախտաբար շարունակվում է, Վիսբադենից տարիներ առաջ Երեւանում վերջնական հանգրվան գտած նրա արվեստանոցում դեռ շատերին է գերելու, բացահայտել տալու արդի կերպարվեստի հսկաներից մեկի մտաշխարհը, տիեզերական անչափելի բովանդակությամբ:
«Ազգ»ի անկեղծ ցավակցությունը Վան Սողոմոնյանի տիկնոջը՝ նկարչուհի, բանաստեղծական գրքերի հեղինակ Նոնա Գաբրիելյանին, դստերը՝ նկարչուհի Լիլիթ Սողոմոնյանին, թոռանը՝ նկարիչ Գայ Ղազանչյանին, փեսային՝ նկարիչ Գագիկ Ղազանչյանին:
Վան Սողոմոնյանի հուղարկավորությունն այսօր՝ հունիսի 7-ին, ժամը՝ 13:00 Կոնդի սուրբ Հովհաննես եկեղեցուց:
ԱՆԱՀԻՏ ՀՈՎՍԵՓՅԱՆ
Գերմանիա
