Փաշինյանի հետ, բայց իշխանությանը դեմ. «ուլտրաընդդիմադիրները»

Ընդդիմությունը՝ որպես կանոն ու չգրված օրենք, պետք է պահանջի իշխանության հրաժարականը, որ ինքը գա իշխանության: Բայց մեր երկրում իրեն ընդդիմադիր համարող քաղաքական գործիչը կարող է քաղցր-մեղցր գրկախառնվել պետության գլխին կանգնած անձի (տվյալ դեպքում՝ վարչապետի հետ), բայց պնդի, թե ինքը ընդդիմություն է:

Փաշինյանի դուռը գնացողների ու նրա հետ սիրառատ քննարկումներ ունեցող «ընդդիմադիրներին» կարելի է մի քանի ընկերների ակումբ անվանել: Նրանք թեեւ 2020-ի նոյեմբերի 9-ի տխրահռչակ հայտարարությունից հետո Փաշինյանի հասցեին խիստ քննադատողական տեքստեր էին ասում, բայց որոշ ժամանակ անց, չգիտես՝ ինչպես, փափկեցին ու լայն ժպտալով շտապեցին կառավարական հանդիպումների: Առավել ճարպիկները սկսեցին իշխանության ջրաղացին ջուր լցնել ու պաշտպանել Փաշինյանի՝ «բա նախկինների ժամանակ լա՞վ էր» ծեծված, անդուլ թեզով սնել՝ իրենց շրջապատի մի քանի մարդկանց:

Բոլորովին այլ է «ուլտրաընդդիմադիր» Էդմոն Մարուքյանի  ու «Լուսավոր Հայաստանի» կարգավիճակը: ԱԺ նախկին պատգամավոր Թեւան Պողոսյանի միջնորդույթամբ մի սեղանի շուրջ նստած ու «Ելք» դաշինք հիմնած երբեմնի թիմակիցներն ի շրջանս յուր են արել, այժմ էլ «ջան են ասում, ջան՝ լսում»: 2018-ի իշխանափոխությունից հետո Փաշինյանի հետ մեկտեղ «նախկինների» մասին հրճվանքով արտահայտվող Մարուքյանը, հիշեցնենք, Սերժ Սարգսյանի հետ հանդիպում-առանձնազրույց ունենալուց էլ չէր հրաժարվում: Նոյեմբերի 9-ի հայտարարությունից հետո նա նույնպես, քարը քարին չթողնելով, Լեւոն Տեր-Պետրոսյանի «ազգակործան պատուհաս» միտքը շուրթերին՝ պնդում էր, թե պարտված ղեկավարը պետք է հեռանա, այժմ սակայն Փաշինյանի կաբինետում հատուկ հանձնարարություններով դեսպան է աշխատում ու չգիտես՝ ինչ տրամաբանությամբ իրեն «կլասիկ» ընդդիմադիր համարում: Մարուքյանն ինչպես որ այսօր է արդարացնում Փաշինյանի քայլերը, նույնպիսի ջերմեռանդությամբ նաեւ պատերազմից մի քանի ամիս առաջ էր պատմում իր ու Նիկոլ Փաշինյանի քաղցր-մեղցր-դառը սրճախմության մասին: Փակ դռների հետեւում ու գաղտնի ռեժիմով սուրճը վայելելիս՝ Փաշինյանը լուսավորականին վստահեցրել էր, որ Արցախի մասով անհանգստանալ պետք չէ: «Այս պահին ես մտահոգություն չունեմ Արցախի հիմնախնդրի հետ կապված»,- վերոնշյալ հանդիպումից հետո լրագրողների հետ զրույցում հայտարարում էր Մարուքյանը:

Փաշինյանական «ընդդիմության» ներկայացուցիչներից մեկն էլ Դավիթ Սանասարյանն է, որ Փաշինյանի կաբինետում պետական վերահսկողական ծառայության պետի պաշտոնն էր զբաղեցնում: Նա վարչապետի՝ Արցախի նշաձողն իջեցնելու մասին հայտարարությունից հետո ահազանգել էր, թե «պետք է կանգնեցնել այդ մարդուն»: Վերջերս սակայն մոռանալով Փաշինյանին կանգնեցնելու իր ահազանգի մասին, գնացել ու հանդիպել է Փաշինյանին ու փարատել իր հուզմունքը:

ՍԵՎԱԿ ՎԱՐԴՈՒՄՅԱՆ