Անկախ այն բանից՝ ում դեմքը ձեզ դուր չի գալիս կամ որ մեկիս ապրածի նկատմամբ կասկած ունեք, ով է ռուսամետ կամ արևմտամետ, մենք մեր գոյության կռիվն ենք տալիս։ Պիտի հավաքվենք ու մեր դերերը բաժանենք։ Գիտնականը միջազգային իր գիտական շրջանակում պետք է կռիվ տա, ուսանողը՝ իր. «Արցախի Հանրապետության միջազգային ճանաչման հրամայականը» համաժողովի ամփոփիչ ասուլիսին իր լույթում ասաց «Համախմբում» շարժման ներկայացուցիչ Մենուա Սողոմոնյանը
Համախմբվենք ու հեղեղ առաջացնենք։ Մենք ամբիցիա չունենք, քաղաքական, կուսակցական գլխարկները հանել ենք. ժողովրդին համախմբվելու կոչ արեցին ընդդիմադիր քաղաքական գործիչները։
Մինչև ժողովուրդը դուրս չգա թմբիրից, չգիտակցի, որ ֆիզիկական ոչնչացման վտանգի տակ է, որ իշխանությունները կեղծ օրակարգերով շեղում են իրենց, ազգային զարթոնք չի լինելու։
«Հանձնեք Քարվաճառը, Աղդամը, Շուշին, Արցախի 75 տոկոսը՝ իբր 35 հազար զինվորի կյանքը փրկելու համար։ Հետո եկավ մեկ այլ փուլ՝ հանձնենք Արցախն ամբողջովին՝ 29 հազար քկմ պահպանելու համար։ Շղթան գալու-հասնելու է յուրաքանչյուրիս տուն, հանձնվողականությունը մեզ դատապարտելու է ոչնչացման»,- վստահ է Մենուա Սողոմոնյանը։
«Համախմբում» շարժումը հակառակ քարոզչություն է անում՝ պահպանել Արցախը՝ հայ ժողովրդի անվտանգությունը երաշխավորելու համար։
Ընդդիմադիր գործիչները մեծ հույս են կապում երիտասարդների հետ։ Նրանք են հանրության շարժիչ ուժը։
«Երիտասարդությանն այսօր զբաղեցնում են տարբեր կեղծ օրակարգերով։ Բանիմաց, մեծ ներուժ ունեցող երիտասարդներին համակում են այն զգացողությամբ, թե նրանք անզոր են, ոչինչ անել չեն կարող։ Անտարբեր մի՛ եղեք, Արցախի համար պայքարից հետ պահող գաղափարներին մի տրվեք։ Դրա գինը լինելու են ծանրագույն ռազմատուգանքները, Արցախի ու հայկական պետականության կորուստը։
«Համախմբում» շարժումը հանդիպումներ է ունենալու ուսուցիչների դասախոսների, ուսանողների, գիտակրթական շրջանակների, պետական կառույցների ներկայացուցիչների հետ։
«Պետական օղակը դիմադրություն ցույց տալու կառուցողական լուրջ ռեսուրս ունի։ 35 տարի առաջ արցախյան զարթոնքի շրջափուլն իշխանություններն ուզում են փակել, մենք թույլ չենք տալու։ Ազգային զարթոնք պե՛տք է լինի։ Մարդիկ պետք է դուրս գան փողոց ու ստիպեն իշխանություններին Արցախն Ադրբեջանին հանձնող թուղթը չստորագրել»,- եզրափակեց Մենուա Սողոմոնյանը։
