Մեծ պատրանք է, որ որևէ մեկը մտածում է, թե ամբողջ ընդդիմությանը հնարավոր է միավորել: Ե՛վ խորհրդարանում, և՛ խորհրդարանից դուրս մենք ունենք շատ բազմատեսակ ընդդիմություն, որոնք հազար ու մի ուղղություն և գաղափարախոսություն են դավանում: Բոլորին մեկ միասնական ճամբարի մեջ միավորելը ուտոպիա է, որը երբեք տեղի չի էլ ունեցել և չի ունենա:
Ավելի իրատեսական է այն լուծումը, ըստ որի՝ կարևոր ուղղություններով ընդհանուր պլատֆորմայի հիման վրա կմիավորվեն բավականաչափ քաղաքական ուժեր և անհատներ՝ ստեղծելու մի այնպիսի ընդդիմություն, որը հայ ժողովրդի կողմից կընկալվի որպես գլխավոր այլընտրանք՝ Փաշինյանի ռեժիմին:
Մենք հիմա բանակցություններ ենք վարում տարբեր քաղաքական ուժերի ու անհատների հետ, որոնք պատրաստ են միավորվել՝ մասնավորապես մեր իրական խաղաղության ծրագրի շուրջ:
Եթե այս համաժողովրդական շարժումը չստեղծենք, ոչ իմփիչմենտով, ոչ էլ ընտրություններով Փաշինյանին հեռացնել չի ստացվի:
Փաշինյանը ի վիճակի չէ խաղաղություն հաստատելու: Նրան ոչ ոք չի էլ հարցնում: Նրան միայն ստիպում են ստորագրել այն թղթերի տակ, որոնք Ադրբեջանին պետք են իր նկրտումները լեգիտիմացնելու համար: Սա խաղաղություն չէ:
Իսկ մեր ծրագիրը իրական խաղաղության ծրագիրն է՝ ուղղված աշխարհաքաղաքական բոլոր խաղացողների հետ համագործակցելու, ինքիշխանությունը վերականգնելու և Զանգեզուրը տրանսպորտային հանգույց դարձնելու հեռանկարին:
Լևոն Զուրաբյան, ՀԱԿ փոխնախագահ
