«Պետականության փլուզման վտանգավոր փուլը» վերնագրի ներքո քաղաքագետ, «Դեմոկրատական այլընտրանք» կուսակցության առաջնորդ Սուրեն Սուրենյանցը վերլուծել է վերջին ժամանակներում սպանությունների ահագնացող դեպքերին։
Աբովյանում գիշերը արձանագրված կրակոցները՝ երեք վիրավորներով (որոնցից երկուսի վիճակը բժիշկները գնահատում են ծայրահեղ ծանր), և Չարենցավանի եկեղեցու ներսում հուղարկավորության ժամանակ կատարված դաժան սպանությունը այլևս չեն կարող դիտվել որպես առանձին քրեական դեպքեր։
Դրանք նույն վտանգավոր շղթայի օղակներն են, որոնք վկայում են մեկ հստակ իրողության մասին՝ պետությունը դադարել է կատարել իր հիմնական գործառույթը՝ ապահովել քաղաքացիների անվտանգությունն ու վերահսկել հասարակական կյանքը։
Երբ կրակոցներն արդեն հնչում են քաղաքների կենտրոններում, իսկ մարդասպանությունը տեղի է ունենում սրբավայրում, դա ոչ թե պատահականություն է, այլ անվերահսկելիության խորքային դրսևորում, որը բնորոշ է միայն թույլ կամ փլուզվող պետություններին։
Եթե այս իրավիճակում իշխանության «հետևությունը» կրկին սահմանափակվի մարզային պաշտոնյաների պաշտոնանկությամբ՝ ինչպես Մերձավան և Արաքս համայնքների սպանություններից հետո, ապա դա ոչինչ չի փոխի։
Նույնիսկ ՆԳ նախարարի կամ երկրի ոստիկանապետի հրաժարականը այլևս չի կարող լինել լուծում․ խնդիրը անհատների անգործությունը չէ, այլ ամբողջ համակարգի կաթվածահար լինելը։
Գործ ունենք ազգային անվտանգության ճգնաժամի հետ։
Եվ եթե Նիկոլ Փաշինյանի խոստացած «Չորրորդ հանրապետությունը» այս վիճակն է՝ սպանություններ սրբավայրերում, կրակոցներ քաղաքներում, անպատժելիություն ու քաոս, ապա պետք է հստակ ասել՝ այդ «հանրապետությունը» կառուցվել է պետականության հիմնասյուների փլուզման վրա։
