«Արցախի Հանրապետության միջազգային ճանաչման հրամայականը» խորագրով գիտագործնական համաժողովի 2-րդ օրվա աշխատաժողովին ի մի են բերվել համաժողովի ընթացքում հնչած գաղափարները, քննարկված թեզերը, այսինքն՝ վերհանվել և ամփոփվել են համաժողովի արդյունքները։ Համաժողովի արդյունքներն ամփոփող առաջին հայտարարությունը, որ արվում է համաժողովի համակազմակերպիչ խմբերի անունից, պարունակում է քաղաքական գնահատականներ և գործող իշխանությունների՝ Արցախի հարցում վարած ուղեգծին այլընտրանքի ընդհանուր մոտեցումներ՝ հիմնված համաժողովի զեկուցումներում ու ելույթներում տրված մասնագիտական գնահատականների, մոտեցումների, գիտական փաստարկների վրա։
Համաժողովի կազմակերպիչները տեղեկացնում են, որ հայտարարության հրապարակումը, դրա դրույթների մեկնաբանումն ու հետագա անելիքների ներկայացումը տեղի կունենա փետրվարի 28-ին՝ ժամը 11․30-ին «Հոլիդեյ ինն» հյուրանոցի Տարսոն սրահում կազմակերպվելիք մամուլի ասուլիսում (հասցե՝ ք․ Երևան, Ամիրյան 2)։
Մամուլի ասուլիսին ներկա կգտնվեն համաժողովի համակազմակերպիչ խմբերի ներկայացուցիչները, ինչպես նաև համաժողովի որոշ բանախոսներ և մասնակիցներ։ Ասուլիսը կվարեն Ավետիք Չալաբյանը, Աբրահամ Գասպարյանը և Մենուա Սողոմոնյանը։
Հիշեցնենք, որ համաժողովը նախաձեռնող կազմակերպություններն են՝
- «Համախմբում» շարժում
- « 5165» շարժում
- «ԱՐԱՐ» հիմնադրամ / ARAR Foundation
- «Թեքեյան» մշակութային միություն
- Genesis Armenia – «Ջենեսիս Արմենիա» հիմնադրամ
- Այլընտրանքային նախագծեր խումբ/ Alternative Projects Group
- «Կոնցեպտուալ Հարթակ» – Conceptual Platform
- «Ազգային արժեք ակումբ»
- Քաղաքագետների հայկական ասոցիացիա
