Գերմանական լրատվամիջոցներն այս շաբաթ անդրադարձան Վրաստանում եւ Հայաստանում բողոքի բազմամարդ հանրահավաքներին՝ անհամեմատ հաճախ ուշադրություն բեւեռելով վրաց ժողովրդի՝ հակառուսական կամ եվրոպական ձգտումների լուսաբանմանը: Առցանց «Ցայթը» մայիսի 9 ին ժամը 22.57- ին է տեղադրել տարբեր գործակալությունների լրատվությամբ հագեցված իր շարադրանքը՝ «Հազարավոր ցուցարարներ պահանջում են Հայաստանի կառավարության հրաժարականը» վերնագրով: Հոդվածում իհարկե չի հստակեցվում ցուցարարների թիվը, սակայն մեծաթիվ լինելու հիմնավորումը ներկայացվում է հղում անելով նաեւ սոցիալական մեդիայում բազմաթիվ տեսանյութերի առկայությանը: Հասկանալի է, որ հոդվածը ուշ է տեղադրվել, քանի որ խմբագրությունը սպասել է զարգացումների ընթացքին՝ «Գալստանյանը պահանջեց Փաշինյանից մեկ ժամում հրաժարական ներկայացնել: Վարչապետն է պատասխանատու հայկական տարածքների կորստի համար: Գալստանյանը հորդորեց ցուցարարներին խաղաղ անհնազանդության գործողությունների դիմել, եթե Հայաստանի վարչապետը բողոքավորների պահանջը չկատարի», գրում է «Ցայթը»՝ շարադրելով դեպքերի մեզ համար ծանոթ ընթացքը՝ ԱԺ-ում ՔՊ-ի մեծամասնության առկայությամբ ՀՀ վարչապետին անվստահություն հայտնելու ոչ դյուրին ընթացքը՝ առանց որեւէ վերաբերմունքի: «Ադրբեջանը, որին հակամարտության մեջ սատարում է Թուրքիան, սահմանային վեճերի ժամանակ նորանոր պահանջներ է ներկայացնում տնտեսապես եւ ռազմական տեսանկյունից տկար Հայաստանին» «Ցայթի» հրապարակման եզրափակիչ նախադասությունն էլ չեզոք արձանագրում է՝ դարձյալ քննադատական անհրաժեշտ տեսակետ չի ներկայացնում գերմանական սույն լրատվամիջոցը:
«Դոյչլանդֆունկը» մայիսի 9-ի եթերում անդրադարձավ բողոքի հանրահավաքին՝ «մի քանի հազար» կամ՝ «բազմահազար» ոչ հստակ բնորոշմամբ արձանագրելով ցուցարարների թիվը:
Նույն լրատվամիջոցը, ինչպես նաեւ գերմանական ntv-ին, մայիսի 13-ին անդրադարձան «Երեւանում 150 ցուցարարի ձերբակալությանը» եւ սեղմ շարադրանքում ներկայացրին, որ հանձնվող տարածքները ռազմավարական նշանակություն ունեն Հայաստանի համար:
ntv-ի «Հայաստանում ոստիկանությունը 150 ցուցարարի է ձերբակալել» վերնագրով հակիրճ տեղեկատվական հոդվածի առաջին պարբերությունն այսպես է սկսվում՝ «Հայաստանն ու Ադրբեջանը կամենում են տասնամյակների հակամարտությանը վերջ դնել՝ խաղաղությանը միտված նախագծով Երեւանը հարեւան երկրին է հանձնելու իր գրավյալ տարածքը: Հարյուրավոր հայեր բողոքի հանրահավաքով իրենց անհամաձայնությունն են հայտնում, 150 մարդ ձերբակալված է»:
«Ցայթի» նշած «հազարավոր» ցուցարաներ անորոշ, սակայն մեծածավալը ntv-ն արդեն նվազեցնում՝ «հարյուրավոր» է ներկայացնում: Սակայն սույն լրատվությունն արձանագրում է, որ «Ադրբեջանին սահմանակից 4 գյուղերը Հայաստանը 1990-ականներին է վերցրել: Տարածքը Հայաստանի համար ռազմավարական նշանակություն ունի՝ ավտոմայրուղին Վրաստանի հետ է կապում, որ արտաքին առեւտրի համար կենտրոնական ուղի է, ռուսական գազատարի եւ ռազմական կարեւոր դիրքերի հետ մեկտեղ: Տեղի եւ մերձակայքի հայ բնակիչները երկյուղում են, որ տարածքները Ադրբեջանին հանձնելու պարագայում արտաքին աշխարհից կկրտվեն»: Ի դեպ նկատելի է նաեւ, որ գերմանագիր հրապարակումների մեջ որեւէ վերաբերմունք, դրական կամ բացասական, չի հաղորդվում, թե հանրահավաքների գլխավոր բանախոսը հոգեւորական է, բարձրաստիճան հոգեւորական: Կարծես դա բնական է նկատվում, հաշվի առնելով այն հանգամանքը, որ Բագրատ Սրբազանը Տավուշի թեմի առաջնորդն է:
Կիրակի երեկոյան Երեւանի Հանրապետության հրապարակում Բագրատ Սրբազան Գալստանյանի ղեկավարած հանրահավաքին անդրադարձել է նաեւ Vatican News-ի գերմաներեն ծաայությունը, որ լուսաբանելով Իննսբրուքի եպիսկոպոս Գլեթթերի հայաստանյան այցը՝ կարճառոտ անդրադառնում է նաեւ ներհայաստանյան դժգոհությանը, եւ նույն օրվա հանրահավաքի մասնակիցների հստակ թիվ չնշելով, արձանագրում է՝ « 10 հազարից ավելի»:
«Վատիկան նյուզը» մտահոգություն է հայտնում Ադրբեջանի վայրագ քաղաքականության, մասնավորապես հայկական պատմամշակութային ժառանգությունը հիմնավեր ոչնչացնելու ծրագրի վերաբերյալ:
Շվեյցարական ավետարանական ref-ը մայիսի 15-ին Դաշնային խորհրդին ուղղելով իր խոսքը հոդորում է Հայաստանի համար ջանք ներդնել: «Ադրբեջանը հավակնում է Հայաստանի հարավում միջանցք ստեղծել. Նոր ռազմական բախման երկյուղ կա. Շվեյցարիայի արտաքին քաղաքականությունը կոչված է աշխատել խաղաղ լուծման ուղղությամբ», գրում է լրատվականը:
Մի ուշագրավ փաստ եւս, որ գերմանագիր լրագրողները անցնող շաբաթ առիթ տվեցին խորհրդածելու՝ նախընտրելով X-ի հարթակը: Շվեդիայում «Եվրատեսիլի» մրցույթին Իսրայելի մասնակցության դեմ նկատելի աշխույժ հակազդեցությունը, որ Մալմոյում 30 000 ցուցարարի էր համախմբել՝ էկոակտիվիստ Գրետա Թունբերգի առաջնորդությամբ, առավել սրվեց դահլիճում, նաեւ սոցցանցերում՝ ատելության խոսքի, հակահրեական արտահայտությունների առատ ժայթքմամբ: Գերմանագիր լրագրողները (Անաստասիա Տիխոմիրովան, Արթուր Վայգանթը, Յան Բյոհմերմանը) առիթ գտան հարց տալու՝ նույն բողոքավոր զանգվածը ձայն հանե՞ց Ադրբեջանի մասնակցության դեմ: Որեւէ մեկը կարծես չբղավեց, չգոռաց…
Հունիսի 9-ին Եվրոպան ընտրության առջեւ է: Աջերի վերելքը տարբեր կուսակցությունների համար իրական սպառնալիք է: Կարո՞ղ է եվրոպաբնակ հայկական սփյուռքն իր քվեի ուժն օգտագործելով Հայաստանի բազմահազարանոց բողոքի ալիքը կրկնապատկել Բրյուսելում… կասեցնել գոնե Բաքվի հայոց մշակութային ժառանգության բնաջնջումը, չարտոնել եվրոպացի քաղաքական գործիչների չեզոք վերարտադրությունը:
ԱՆԱՀԻՏ ՀՈՎՍԵՓՅԱՆ
Գերմանիա
«Ցայթում» տպագրված լուսանկարի հեղինակը Կարեն Մինասյանն է
