Չափից դուրս երիտասարդ տարիքում պատգամավոր դարձածները եթե կարծում են՝ պատմության ուսուցիչ կամ դասղեկ են, սխալվում են: Իրենց չկայացվածության հետեւանք է նման տպավորությունը՝ խորհրդարանի «Հայաստան» խմբակցության պատգամավորն արձագանում է իշխանականների այն ձեւակերպմանը, թե ընդդիմությունը, խելոք, գլուխը կախ, կգնա խորհրդարան:
«Ընդդիմությունը խելոք որեւէ տեղ չի գնա, ընդդիմությունն իր առաքելությունը, խնդիրներն ու ստացած մանդատն ունի, ըստ այդ մանդատի էլ շարժվում է»,- նշում է Գեղամ Մանուկյանը:
Խորհրդարան վերադառնալն ընդդիմադիր պատգամավորը ֆիզիկական գործողություն է համարում, եւ դա, ասում է՝ օրակարգ չի կարող լինել: Հայաստանի առջեւ ծառացած բազմաթիվ խնդիրրների շուրջ գործունեություն ծավալելն է իրենց պարտականությունը, ինչն անում են: Անցած երկու շաբաթվա ընթացքում Սեյրան Օհանյանի հետ եղել են Սյունիքում, այցելել են Ներքին Հանդ, որտեղ թշնամին առաջ է եկել, բայց իշխանությունը փորձում է արդարանալ, թե նման բան չկա: Եղել են Տավուշում: Այստեղ Մանուկյանն անվտանգային առումով մտահոգիչ տարրեր է նկատել, որոնց մասին առայժմ չի բարձրաձայնի, այլ որպես պաշտպանության հանձնաժողովի անդամ՝ պատգամավորական հարցադրումներ կանի Պաշտպանության եւ Տարածքային կառավարման նախարարություններ եւ այլ գերատեսչություններ:
Իսկ ի՞նչ է կատարվում տարածաշրջանում եւ ինչու՞ էին մեկը մյուսի հետեւից Հայաստան գալիս ԱՄՆ եւ ՌԴ արտաքին հետախուզության ծառայությունների ղեկավարները. Գեղամ Մանուկյանը մանրամասներ չգիտե։ Կառավարությունը հանգամանալից տեղեկատվություն չի տրամադրել: Բայց այն, որ իշխանությունը փորձում էր կոծկել Ուիլյամ Բըրնսի այցը, մինչև տեղեկատվական արտահոսքը, պատգամավորը խոսուն փաստ է համարում:
Մեկ արտառոց դրվագ եւս. ամերիկացի պաշտոնյան հանդիպել էր անվտանգության խորհրդի քարտուղարի և Նիկոլ Փաշինյանի հետ, իսկ իր գործընկերոջ՝ ԱԱԾ տնօրենի հետ առանձին հանդիպում չէր ունեցել: Մանուկյանը կարծում է ՝ ժամանակի ընթացքում ինչ-որ ծալքեր կբացահայտվեն:
