Լուրը, որ Ռուսաստանից Հայաստան ներկրվող գազի գինը 2024 թվականին չի փոփոխվի, շատ լավն է և բնական. դա վարքագիծ է, որը Հայաստանը կարող էր ակնկալել իր դաշնակից Ռուսաստանից։ Azg.am-իթղթակցի հետ զրույցում նման տեսակետ հայտնեց էներգետիկ անվտանգության հարցերով ՄԱԿ-ի ազգային փորձագետ Արա Մարջանյանը՝ անդրադառնալով ՀՀ վոխվարչապետ Մհեր Գրիգորյանի այն հայտարարությանը, որ ՌԴ-ից Հայաստան ներկրվող գազի գինը 2024 թվականին չի փոփոխվի, ըստ այդմ՝ սակագինը չի փոփոխվի նաև սպառողների համար։
«Ընդհանրապես, գազի երկարաժամկետ կայուն գները միշտ դրական ազդեցություն են ունենում թե՛ տնտեսական զարգացման, թե՛ գործարար ակտիվության վրա։ Հույս ունեմ, որ առաջիկա 5 տարվա ընթացքում իրադրությունն այս ուղղությամբ կմնա կառավարելի»,- ասաց մեր զրուցակիցը։
Արա Մարջանյանի կարծիքով՝ Հայաստանի համար գազի գինը չթանկացնելը ևս մեկ անգամ շեշտում է, որ Հայաստանի և Ռուսաստանի միջև երկարաժամկետ համագործակցությունն ունի խոր և երկարատև ժամանակային հորիզոն և ենթակա չէ ընթացիկ քաղաքական հարաբերություններին։
«Ցանկությունս և ակնկալիքս է, որ առաջիկա տարիներին ռուսական գազի գինը չի փոփոխվի, որովհետև որքան էներգակիների սակագների մասով երկարաժամկետ կանխատեսելի իրավիճակ լինի, այնքան ավելի լավ։ Իմիջիայլոց, անպայման չէ, որ սակագները հաստատուն մնան, ուղղակի խելամտության սահմաններում պետք է կանխորոշելի լինեն։ Փոփոխությունները չպետք է լինեն հանկարծակի կամ մեծ մասշտաբների։
Որքան այս կայունությունը պահպանվի, այնքան դա ՀՀ տնտեսության և ընդհանուր սոցիալ-տնտեսական զարգացան վրա դրական ազդեցություն կունենա»,-ասաց էներգետիկ անվտանգության հարցերով ՄԱԿ-ի ազգային փորձագետը։
Հարցին՝ ի՞նչը կարող է ստիպել Ռուսաստանին՝ վերանայելու Հայաստանին վաճառվող գազի գինը, Արա Մարջանյանը նկատեց՝ ՌԴ-Արևմուտք ճակատում բացասական զարգացումները, տարածաշրջանային լուրջ անկայունությունըհ, պատերազմը և ահաբեկչական գործողությունները։
«Հիշեցնեմ, որ 90-ականների սկզբին՝ երեք տարվա ընթացքում, մենք մոտավորապես 150 անգամ գազատարի պայթյուն ունեցանք։ Աստված մի արասցե, որ նման իրադրությունը կրկնվի»,- ամփոփեց մեր զրուցակիցը։
