Փոխադարձության սկզբունք

451

Գրիգոր Առաքելյան, Իրանում ՀՀ նախկին դեսպան, –

Հուլիսի 15-ին սոցցանցերը մեծ խանդավառությամբ հրապարակեցին Իրանի նորընտիր նախագահ Էբրահիմ Ռայիսիի՝  ՀՀ վարչապետի պաշտոնակատար Նիկոլ  Փաշինյանին հասցեագրված ուղերձը՝  ջերմ ու հաճոյաբանական խոսքերի մեջբերումով։ Խանդավառությունը պայմանավորված  էր այն  հոգեմաշ սպասումով, որ վերջապես Իրանի բարձր ղեկավարությունը  Հայաստանի հետ բարիդրացիական  հարաբերությունների տրամաբանությունից  ելնելով,  կմիանա 2021 թվականի հունիսի 20-ին  ՀՀ-ում անցկացված արտահերթ խորհրդարանական ընտրություններում  Փաշինյանի գլխավորած   «Քաղաքացիական պայմանագիր» կուսակցության   հաղթանակի առթիվ  այլ երկրների  շնորհավորանքներին:

Նիկոլ Փաշինյանին հասցեագրված Էբրահիմ Ռայիսիի ուղերձի առաջացրած խանդավառությունը  նաև պայմանավորված էր այն իրողությամբ,  որ   ի տարբերություն  մյուս բարեկամ  երկրների, Հայաստանի ընրությունների կապակցությամբ  Իրանից արձագանք  էր հնչել  միայն  ԻԻՀ ԱԳՆ խոսնակի մակարդակով, ով ընդամենը  շնորհավորել  էր հայ ժողովրդին ու արտահերթ ընտրություններում  հաղթանակած բոլոր ուժերին։

Իրանական կողմից բարձր մակարդակով  շնորհավորանքի ակնկալիքը նաև պայմանավորված էր դիվանագիտական հարաբերությունների հիմքը հանդիսացող փախադարձության սկզբունքով։ Չէ՞ որ 2021 թվականի հունիսի 18-ին Իրանում անցկացված նախագահական ընտրություններում  հաղթանակած Էբրահիմ Ռայիսիին, անգամ  մինչև  ընտրությունների արդյունքների պաշտոնական հրապարակումը,  շտապել էին շնորհավորել ՀՀ նախագահն ու ՀՀ վարչապետը։

Սակայն, հուլիսի 15-ին սոցցանցերում  հրապարակված  ԻԻՀ նորընտիր նախագահ Ռայիսիի   ուղերձը կարդալիս, քչերը նկատեցին, որ նամակում  բացակայում  էր Փաշինյանի գլխավորած կուսակցության  հաղթանակի կապակցությամբ շնորհավորանքը։

 Պարզվում  է   Էբրահիմ  Ռայիսին գրեթե մեկամսյա ուշացումով  շնորհակալություն է  հայտնում Փաշինյանին, ԻԻՀ նախագահական ընտրություններում  իր տարած հաղթանակի առիթով  հղած շնորհավորանքի համար։