Հայաստանում տեղի ունեցան հերթական արտահերթ խորհրդարանական ընտրությունները: Ներկայիս ընտրությունների արդյունքներն, այս դեպքում, նշանակություն չունեն: Այս մասին NEWS.am-ի թղթակցի հետ զրույցում ասաց քաղտեխնոլոգ Կարեն Քոչարյանը:
Վերլուծաբանը, մասնավորապես, պարզաբանեց, որ Հայաստանին, ըստ էության, ամեն դեպքում սպասվում են հերթական արտահերթ խորհրդարանական ընտրություններ: Ճիշտ է, նա կոնկրետ ժամկետ չնշեց: «Նման կերպ մտածելու բավարար հիմքեր կան: Իշխանությունները հիմա շատ բան են փոխում: Օրինակ՝ այսօր փոխեցին վարչապետի աշխատակազմի ղեկավարին: Ես չգիտեմ՝ կփոխե՞ն արդյոք նրանք նախարարներին, թե՞ ամեն ինչ կթողնեն այնպես, ինչպես կա։ Հայտնի չէ, թե որքանով կփոխվի Կառավարության կազմը, բայց այն, որ այս թիմում գործնականում մենեջերներ եւ կառավարողներ չկան, իմ կարծիքով, վերջին երեք տարիների ընթացքում համոզվեցին բոլորը»,- ասաց Քոչարյանը:
Բարձրաձայնելով այն թեզը, որ «Հայաստան» դաշինքը էական սխալներ թույլ տվեց, քանի որ այնտեղ շատ շուտ սկսեցին հաջողություն գրանցել, քաղտեխնոլոգը դա հաստատեց՝ մատնանշելով այլ պատճառներ: «Կարծում եմ, որ սխալներ կային, բայց դրանք կապված չեն այն բանի հետ, որ նրանք շատ շուտ սկսեցին ֆիքսել իրենց հաղթանակը: Կարծում եմ՝ այստեղ էական դեր խաղաց թիմի մոտիվացիան, ոչ թե հաջողության տոնումը: Մեծ հաշվով, բոլորը, նույնիսկ նրանք, ովքեր նույնիսկ 1% ձայն չեն հավաքել, ասում են, որ հենց իրենք են հաղթելու ընտրություններում: Սա նախընտրական տեխնոլոգիա եւ մոտիվացիա է, որը բոլորն են օգտագործում: Բանն այն է, որ ոչ «Հայաստան» դաշինքը, ոչ «Պատիվ ունեմ» դաշինքը, ոչ էլ մյուս ուժերը, որոնք աշխատել են այս իշխանությունից առաջ, երբեք չեն ասել ամենակարեւոր եւ նվիրական բառը՝ «ներեցեք»:
Դա այդպես էլ չարվեց: Հասկանում եք, նրանց կողմից կա ինչ-որ սնոբիզմ»,- նկատեց Քոչարյանը՝ հավելելով, որ հանրապետության վարչապետի պաշտոնակատար Նիկոլ Փաշինյանը, ով իր կառավարման երեք տարիների ընթացքում, ըստ էության, այդպես էլ ոչինչ չարեց, միայն ներողություն էր խնդրում ամեն հարմար պահի։ Փորձագետը նշեց նաեւ ընդդիմության թույլ տված այլ սխալներ: Որպես ամենակարեւորներից մեկը, նա մատնանշեց մարզերում, գյուղերում աշխատանքը, որտեղ քարոզարշավը պատշաճ մակարդակով չէր իրականացվում, ինչը հետագայում խոստովանեց երկրորդ նախագահ Ռոբերտ Քոչարյանը, ով գլխավորում է «Հայաստան» դաշինքի նախընտրական ցուցակը: «Դե, կարծում եմ, որ բոլորը ինչ-որ եզրակացություններ կանեն: Սակայն դա արդեն ապագայի համար է»,- ասաց վերլուծաբանը: Նա նաեւ մեկնաբանեց Ռոբերտ Քոչարյանի այն հայտարարությունը, թե «Հայաստան» դաշինքը կվերականգնի հասարակության վստահությունը խորհրդարանական ընդդիմության նկատմամբ:
«Կապրենք՝ կտեսնենք։ Ժամանակը ցույց կտա»,- կատակեց քաղտեխնոլոգը: Այնուամենայնիվ, նա նշեց, որ Հայաստանում շատերը տեղեկատվական տեռորի են ենթարկվում, եւ բավական հաճախ: Տեղեկատվական տեռորի, ըստ նրա, ենթարկվում են նույնիսկ սովորական մարդիկ: «Այս շարժման` Հայաստանում տեղեկատվական տեռորի հիմնադիրներից մեկը հենց Նիկոլ Փաշինյանն է: Բացեք «Հայկական ժամանակ» թերթերը, սկսած 1999-ից մինչեւ 2018 թվականները, եւ այնտեղ այդ ամենը հստակ երեւում է»,- ամփոփեց Քոչարյանը:
