Ի՞նչ նպատակ է հետապնդում Ադրբեջանի արտաքին քաղաքականությունը, երբ Խաղաղ օվկիանոսի հարավ արևմուտքում գտնվող Նոր Կալեդոնիայում խժդժություն է հրահրում: Նախորդ շաբաթ Ադրբեջանի դրոշն ու նույնիսկ Ալիեւի դիմանկարով պաստառը երեւացին Ֆրանսիային պատկանող Նոր Կալեդոնիայում, որ Բաքվի հրահանգով սկսել է վերագնահատել գաղութարարների քաղաքականությունը, դեմ է Փարիզի առաջարկած ընտրական օրենքի բարեփոխմանը եւ Ֆրանսիայից անկախանալու վճռականությամբ՝ պատրաստ է նույնիսկ բիրտ ուժ ցույց տալ: Նիկելի պաշարներով հարուստ կղզում 1988-ից ի վեր վիճակն այսքան չէր սրվել, 4 քաղաքացի, ֆրանսիացի երկու ժանդարմ արդեն զոհվել են, եւ երեքշաբթի օրը Ֆրանսիայի նախագահ Էմանուել Մակրոնը մեկնել է Նոր Կալեդոնիա՝ բանակցությունների միջոցով տեղաբնակներին հանդարտեցնելու: Նոր Կալեդոնիայի Ազգային խորհուրդը Փարիզին մեղադրում է իրենց խնդիրներն անուշադրության մատնելու, տեղաբնակներին ստորադասելու մեջ: Գերմանական ARD-ն մայիսի 22-ին անդրադառնալով Նոր Կալեդոնիայի խժդժություններին՝ ակնարկում է, թե սրանով Ադրբեջանը Արեւմուտքին, մասնավորապես Ֆրանսիային ցուցադրում է իր ուժը: Ավելի շուտ դրա փորձն է անում:
Ֆրանսիայի ներքին գործերի նախարարը France 2-ին հաղորդել է, որ «իրականում Ադրբեջանը խառնվում է Նոր Կալեդոնիայի ներքին գործերին» եւ անկախության շարժման նախաձեռնողներից է: Նոր Կալեդոնիայի ակտիվիստների մեջ տեսանելի աշխույժ է «Բաքվի նախաձեռնող խմբի» լոգոն: 2023-ի հուլիսին Բաքվում հիմնադրված խումբը ղեկավարում է Աբբաս Աբբասովը, որ ադրբեջանական «Թրենդ» գործակալությանը տված հարցազրույցում ասել է, թե սատարում են «գաղութարարության եւ նոր գաղութարարության դեմ պայքարին»: Եւ նրանց սեւեռակետն այժմ Ֆրանսիան է՝ իր գաղութներով: Ակտիվ են սոցցանցերում, նաեւ գիտաժողովներ են կազմակերպում:
Ադրբեջանցիներին հետաքրքրո՞ւմ է Նոր Կալեդոնիայում ապրողների խնդիրը, երբ մեծ հաշվով աշխարհագրական այդ տեղանքը քարտեզի վրա դժվար գտնեն: Ուրեմն ինչո՞ւ է Բաքուն թիրախավորել Ֆրանսիան: Պատճառը Ֆրանսիայի՝ Հայաստանին երկարաժամկետ ռազմական սատարման ընդլայնումն է, կարծիք է հայտնում ARD-ի վերլուծաբան Զիլվիա Շթյոբերը:
ԱՆԱՀԻՏ ՀՈՎՍԵՓՅԱՆ
Գերմանիա
