Բոստոնում «Ավրորա» մարդասիրական նախաձեռնության պատասխանատու անձինք մայիսի 2-ին հայտարարել են, որ Մ. Նահանգների պետքարտուղարության, ՆԱՏՕ-ի եւ ՄԱԿ-ի աշխատանքներում սերտորեն ներգրավված նախկին դիվանագետ եւ նավատորմի վետերան Րաֆֆի Գրիգորյանը ընտրվել է իր հանգուցյալ հոր՝ դոկտ. Վարդան Գրիգորյանի համահիմնադրած կառույցի տնօրենների խորհրդի անդամ, տեղեկացնում է «Արմինյն Միրոր-Սփեքթեյթր» շաբաթաթերթը:
«Ավրորան» իր գործունեությունն է մեկնարկել 2015-ին Վարդան Գրիգորյանի կողքին նաեւ ազգասեր նվիրյալներ՝ Նուբար Աֆեյանի եւ Ռուբեն Վարդանյանի անսակարկ ջանքերի շնորհիվ: Կառույցի գործունեությունից մինչ օրս ավելի քան 427 ծրագրեր են իրականացվել աշխարհի 56 երկրներում:
«Երկար ժամանակ է, ինչ ճանաչում եմ Րաֆֆիին, խաղաղությանը եւ արդարությանը նվիրված իր պարտավորվածությունը իսկապես հատկանշական է: Մ. Նահանգներին անձնուրաց ծառայելուց հետո, այժմ նա իր անգնահատելի փորձառությունն է փոխանցելու «Ավրորա» նախաձեռնությանը՝ առաջ տանելու իր համարձակ առաքելությունը եւ միաժամանակ շարունակելու իր վաստակաշատ հոր ժառանգությունը», նշել է այս առթիվ տնօրենների խորհրդի նախագահ Նուբար Աֆեյանը:
Րաֆֆին ՄԱԿ-ի հակա-ահաբեկչական գրասենյակի հիմնադրման մղիչ ուժն է եղել եւ 2019-ին նշանակվել է նրա առաջին տօրենը, դառնալով նաեւ գլխավոր քարտուղարի տեղակալների կոմիտեի պատվավոր անդամներից մեկը: Մոտ 25 տարի ծառայել է հակամարտությունների եւ հետկոնֆլիկտային մարտահրավերների հաղթահարման ներքին եւ արտաքին առաքելությունների իրագործման հանձնախմբերում: Միջազգային հարաբերությունների եւ ռազմավարական հետազոտությունների գծով դոկտորականի գիտական աստիճան է ստացել Ջոնս Հոպկինս համալսարանի «Միջազգային առաջավոր ուսումնասիրությունների» բաժնից:
«Մեծ պատիվ է անդամակցել «Ավրորայի» տնօրենների վարչությանը: Այս նախաձեռնությանը մասնակից դառնալը հատուկ նշանակություն ունի ինձ համար, որովհետեւ այն իմ հոր ամենափայփայած ծրագրերից մեկն էր: Ուստի կարող եմ ասել, որ կարծես տուն եմ վերադառնում: Երախտապարտ եմ «Ավրորայի» գործադրած ջանքերին միանալու ինձ ընձեռված այս հնարավորության համար», նշել է Րաֆֆի Գրիգորյանը:
Ավելացնենք, որ «Ավրորայի» հերթական մրցանակաբաշխությունը այս տարի տեղի է ունեցել Լոս Անջելեսում (Կալիֆոռնիա) մայիսի 9-ին: Մրցանակի արժանացել է Կոնգոյի դեմոկրատական հանրապետությունից դոկտ. Դենիս Մուկվեգեն, որ գինեկոլոգ-վիրաբույժ է, մասնագիտացած հատկապես բռնաբարության ենթարկված կանանց բուժման գործընթացներում: Խաղաղության Նոբելյան մրցանակի դափնեկիր է եղել 2018-ին:
Պատրաստեց՝ ՀԱԿՈԲ ԾՈՒԼԻԿՅԱՆԸ
