Երկարատեւ ու տանջալից հիվանդությունից հետո երեկ, 74 տարեկան հասակում, կյանքից հեռացավ հայկական մերօրյա գրատպության ամենավաստակաշատ դեմքը՝ «Տիգրան Մեծ» հրատարակչատան տնօրեն Վրեժ Մարկոսյանը: Տպագրական նոր տեխնոլոգիաների Հայաստան ներմուծման եւ կիրառման ասպարեզում անգնահատելի ծառայություններ մատուցած մի անձնավորություն՝ որին երախտապարտ են մնալու ոչ միայն անհատ հեղինակներն ու կազմակերպությունները, այլեւ տպագիր մամուլի խմբագիրներն ու տնօրենները: Արդարեւ, առանց Վրեժ Մարկոսյանի արտակարգ ձեռներեցության ու կազմակերպված աշխատանքի անհնար է պատկերացնել թերթերի եւ ամսագրերի հրատարակումը Հայաստանում, հատկապես անկախության առաջին՝ դժվարագույն տարիներին:
Հաջորդիվ ավելի մանրամասն կանդրադառնանք նրա վաստակին ու գործունեությանը:
«Ազգ»ը խորապես վշտակցում է հարազատներին ու գործընկերներին:
Հոգեհանգիստը տեղի կունենա այսօր, ուրբաթ, դեկտ. 13-ի երեկոյան ժամը 18:00-ին, Կոնդի Ս. Հովհաննես եկեղեցում: Հուղարկավորությունը՝ վաղը, շաբաթ, ժամը 14:00-ին, նույն վայրից:
