«Wall Street Journal»-ը, վկայաբերելով Սաուդյան Արաբիայի՝ ԱՄՆ-ին տրամադրած հետախուզական տվյալները, նոյեմբերի 2-ի իր հրապարակման մեջ հայտնել է, որ Իրանը պատրաստվում է հարձակում իրականացնել Սաուդյան Արաբիայի դեմ: Ըստ նույն հրապարակման, հարձակումը նախատեսվում է իրականացնել առաջիկա 48 ժամերի ընթացքում:
Տեղեկացնենք, որ տվյալ հաղորդագրության հրապարակումից 48 ժամ անց՝ նոյեմբերի 4-ին, այսօր, իրանցիները նշելու են 1979 թվականին Թեհրանում ԱՄՆ դեսպանության գրավման տարեդարձը: Հայտնի է, որ 43 տարի առաջ այդ օրը «Իմամի ուղեգծի հետեւորդներ» անվանումն ստացած խմբավորմանն անդամակցող մի խումբ ուսանողներ գրավեցին Թեհրանում ԱՄՆ դեսպանության շենքը՝ պատանդ վերցնելով դիվանագետներին: Իսլամական հեղափոխության մշակութաբանության մեջ ԱՄՆ դեսպանության նկատմամբ իրականացված այդ գործողությունն ստացավ «Լրտեսական որջի գրավում», իսկ արեւմտյան ԶԼՄ-ների կողմից՝ «Պատանդառության ճգնաժամ» անվանումները: Իսլամական հեղափոխության առաջնորդ իմամ Խոմեյնին էլ այդ իրադարձությունն անվանեց «երկրորդ հեղափոխություն»:
Ենթադրվող «մոտակա ռազմական գործողությունների» մասին տարածված լուրը մեծ իրարանցում առաջացրեց ոչ միայն Պարսից ծովի տարածաշրջանում, այլեւ՝ ողջ աշխարհում:
Սպիտակ տունն էլ պատրաստակամություն հայտնեց, անհրաժեշտության դեպքում, հակահարված հասցնել Իրանին:
Արձագանքելով Սաուդյան Արաբիան հարձակման թիրախ դարձնելու մասին շրջանառվող լուրերին, ԻԻՀ ԱԳՆ խոսնակ Քանանին «Wall Street Journal»—ի հաղորդագրությունն անվանել է «կանխակալ նպատակ հետապնդող» տեղեկատվություն եւ հավելել. «Արեւմտյան ու սիոնիստական շրջանակների կողմից տարածվող նման կարգի տեղեկատվությունները նպատակ ունեն Իրանի շուրջ ստեղծել բացասական մթնոլորտ եւ խարխլել տարածաշրջանի որոշ երկրների հետ տեղի ունեցող դրական գործընթացները»:
Գ.Ա.
