Պաշտպանության նախարարն օրերս հերթական այցն է կատարել բանակային զորամիավորումներից մեկը, ինչի մասին տեղեկանում ենք նախարարության տարածած հաղորդագրությունից ու դրան կցված լուսանկարներից, տեսանյութից: Հաղորդագրության մեջ ուշագրավ թերեւս երկու նախադասություն կա: Առաջինն այն է, որ նախարարին ուղեկցել է Զինված ուժերի գլխավոր շտաբի նորանշանակ պետը, այսինքն՝ ԳՇ-ն մոտ հնգամսյա դադարից հետո վերջապես պետ ունի: Չնայած դեռ հարց է, թե նա ինչպե՞ս է կառավարելու ոլորտն ու ի՞նչ քայլեր է ձեռնարկելու պատերազմից խստագույնս տուժած բանակի վերազինման համար: Նորանշանակ ԶՈւ պետ Էդվարդ Ասրյանն ի դեպ, այն զինվորականներից մեկն էր, որ ստորագրել էր 30-ից ավելի զինվորականների՝ Փաշինյանի հրաժարականը պահանջող հրաժարականի ներքո:
Նախարարության տարածած հաղորդագրության ուշագրավ երկրորդ նախադասությունը հետեւյալն է. «Պաշտպանության նախարարը վստահեցրել է, որ առաջնագծի անվտանգության ապահովման հետ կապված բոլոր խնդիրները պատշաճ կերպով կուսումնասիրվեն եւ կլուծվեն»:
44-օրյա պատերազմից հետո, փաստորեն, երկրի անվտանգության ու պաշտպանության թիվ մեկ օղակը դեռ նոր-նոր պետք է ուսումնասիրի սահմանների ամրակայման հարցը: Նմանօրինակ հարցերը վաղուց, շատ վաղուց պետք է ուսումնասիրված լինեին, այժմ դրանց լուծելու ու հարցերը տեղը գցելու ժամանակն է: Չնայած, եթե պաշտպանության նախարարը զբաղված է կուսակցական գործունեությամբ, դժվար թե սահմանային հարցերը խորությամբ քննելու ժամանակ ունենա:
Ի դեպ, պաշտպանության նախարարության լրատվական ծառայության աշխատակիցները կամ գուցե Պապիկյանի խորհրդատուներն այս անգամ խուսափել են դիրքերը դատարկ, չկահավորված ներկայացնելու ոչ պորֆեսիոնալ մոտեցումից:
ՍԵՎԱԿ ՎԱՐԴՈՒՄՅԱՆ
