Սեպտեմբերի 21-ին Հայաստանի Նկարիչների միության «Մարտիրոս Սարյան» ցուցասրահում բացվեց գեղանկարիչ Գայանե Խաչատրյանի հոբելյանական ցուցահանդեսը: Նկարչուհին նշեց, որ ցուցահանդեսի օրն ընտրելուց հետո է լարվել իրավիճակը սահմանում, բայց երկար մտածելուց հետո որոշում է կայացրել չընդհատել ցուցահանդեսը, քանի որ կարեւոր է հատկապես այս օրերին տեսնել, կարեւորել գեղեցիկը, որն էլ օգնում է ապրել եւ ապրեցնել: «Վերջիվերջո ցուցահանդեսի օրը ընտրում ենք մենք, իսկ պատերազմի օրը` ոչ: Կարեւոր է, որ հատկապես այս օրերին մարդիկ չկորցնեն իրենց ներսում ապրող փոքրիկ մարդուկին, տեսնեն գեղեցիկը, լավը, որ դիմանան»,- մեզ հետ զրույցում ընդգծեց Գայանե Խաչատրյանը: Ցուցահանդեսում ընդգրկված է նկարչուհու աշխատանքներից 60-ը:
Նկարիչ Արթինն էլ պատմեց, որ Գայանե Խաչատրյանի հետ ծանոթ է վաղուց: «Գայանեն շատ ձգտող է, միշտ փորձում է գտնել նորը, ստեղծագործել, անել հետաքրքրականը: Ի դեպ, նա հրաշալի երգում է ժողովրդական երգեր: Երգն էլ իր դերն ունի նրա ստեղծագործելու ոճի, կտավների դետալների մեջ: Նկարչությունն իր երգն է», – զրույցի ավարտին նշեց նկարիչ Արթինը:
Ցուցահանդեսը շարունակվեց մինչեւ սեպտեմբերի 25-ը ներառյալ:
ԱՆՆԱ ՀԱՐՈՒԹՅՈՒՆՅԱՆ
