ՀՀ ԳԱԱ-ում 2024թ. հոկտեմբերի 11-12-ին տեղի ունեցավ «Էպոս, ինքնություն եւ մշակույթ» էպոսագիտական 6-րդ միջազգային գիտաժողովը՝ նվիրված «Սասնա Ծռեր» էպոսի ուսումնասիրության 150-ամյակին:
Գիտաժողովը բացեց ՀՀ ԳԱԱ Հնագիտության եւ ազգագրության ինստիտուտի տնօրեն Ա. Բոբոխոյանը: Գիտաժողովի մասնակիցներին ողջունեց ՀՀ ԳԱԱ Հայագիտության եւ հասարակական գիտությունների բաժանմունքի ակադեմիկոս-քարտուղար Յուրի Սուվարյանը: «Մեր դյուցազներգությանը նվիրված այս գիտաժողովը չափազանց կարեւոր է մանավանդ մեր օրերում: Գիտաժողովի թեման շատ արդիական է, ունի ոչ միայն գիտական, մշակութային, մշակութաբանական, այլեւ՝ գործնական նշանակություն, մեր պատմությունն ու մշակույթն օտար հարձակումներից պաշտպանելու տեսակետից: Մեր դյուցազներգության ամբողջ տրամաբանությունն ուղղված էր անկախության ձեռքբերմանը՝ ազգային ազատագրական շարժմանը: Այսօր գիտաժողովում հնչող դրույթները պետք է նպաստ բերեն մեր անկախ պետականության անվտանգությանը, եւ, անշուշտ, մշակույթի, գիտության զարգացմանը»,- նշեց Յուրի Սուվարյանը:
Երկօրյա միջազգային գիտաժողովի ընթացքում ներկայացվեց 27 գիտական զեկուցում «Վիպասում, արխաիկ պատում եւ տարբերակայնություն», «Պատմամշակութային միջավայր եւ արքետիպեր», «Տարածաշրջանային կապեր եւ վիպական ավանդույթ», «Վիպական երգ եւ մոտիվ», «Էպոսը հարակից գիտակարգերի տիրույթում» թեմաներով նիստերի շրջանակում:
Գիտաժողովը կազմակերպել էր ՀՀ ԳԱԱ Հնագիտության եւ ազգագրության ինստիտուտը Հայագիտական ուսումնասիրությունները ֆինանսավորող համահայկական հիմնադրամի աջակցությամբ:
ՍՏԵՓԱՆ ՊԱՊԻԿՅԱՆ
