Հոկտեմբերի 19-ին «Ֆրիդրիհ Էբերտ», «Կոնրադ Ադենաուեր», «Հայնիրիհ Բյոլ», «Ֆրիդրիհ Նաուման» հիմնադրամների Հարավային Կովկասի գրասենյակի ղեկավարները «Ֆրանկֆուրտեր ալգեմայնե ցայթունգում» Գերմանիային եւ Եվրոպային հորդորում են ներգրավվել, հրատապ եւ անհապաղ միջոց ձեռնարկել՝ «կանխելու Հայաստանի հետագա ապակայունացումը, զսպելու Ադրբեջանի վայրագ գործողությունները, տարածաշրջանը վերաբռնկման հրդեհից զերծ պահելու համար: Ադրբեջանի կողմից ԼՂ-ն վայրագորեն գրավելուց հետո, Հայաստանը հայտնվել է մեծ մարտահրավերների, անորոշ ապագայի առջեւ: ՌԴ-ն չի կատարել իր ավանդական՝ Հայաստանի պաշտպանի, դաշնակցի դերը, ճնշում է ՀՀ-ին, դե ֆակտո սատարում է Ադրբեջանին», նշում են գերմանական հիմնադրամների ղեկավարները՝ հուշելով՝ Հայաստանին անհրաժեշտ է եվրոպական հեռանկար: Հոկտեմբերի 18-ին նույնաբովանդակ պահանջով էր դիմել Բունդեսթագի արտաքին հարաբերությունների հանձնաժողովի նախագահ Միշայել Ռոթը՝ X-ի միկրոբլոգում ՀՀ ԱԺ գործընկերների հետ Բեռլինում հանդիպման լուսանկարը հրապարակելով, կից գրառմամբ՝ «Հայաստանի հետ ենք: Դադարեցրեք Ադրբեջանի եւ Ռուսաստանի ագրեսիան Հայաստանի ժողովրդավարության դեմ»:
ԱՆԱՀԻՏ ՀՈՎՍԵՓՅԱՆ
Գերմանիա
