Թուրքական թերթը պահանջում երկրից վտարել բոլոր հրեաներին
Հոկտեմբերի 17-ին, երբ ԱՄՆ նախագահ Ջողեֆ Բայդենը վաշինգտոնից ուղեւորվում էր Իսրայել, իսրայելական օդուժը ռմբակոծում է Գազայում «Ալ Ահլի Ալ Արաբ» հիվանդանոցը, որի հետեւանքով զոհվում է առնվազն 500 հոգի, մեծամասնությամբ կանայք եւ երեխաներ: Al arabiya հեռուստակայանի տվյաներով, սակայն, զոհվածների թիվը գերազանցում է 800-ը: Ամենեւին չի բացառվում, որովհետեւ ռմբակոծության համար, ըստ թուրքական աղբյուրների, իսրայելական օդուժը մեկ տոննա կշռող ռումբ է օգտագործել:
Իսրայելի այս վայրագությունը բուռն հակազդեցություն առաջ բերեց աշխարհում: Իսրայելին դատապարտում են ՄԱԿ-ը, UNICEF-ն ու Եվրոպայի Խորհուրդը, որոնց միացել են բազմաթիվ պետություններ, ինչպիսիք են Գերմանիան, Ֆրանսիան, Կանադան, Նորվեգիան, Սլովենիան, ինչպես նաեւ տարածաշրջանային պետություններից Իրանը, Եգիպտոսը, Ալժիրը, Սաուդյան Արաբիան, Քաթարը, Լիբանանը եւ ուրիշներ: Իսպանիան, ի դեմս սոցիալական իրավունքների նախարարի պաշտոնակատար Ione Bellara-ի, հայտարարել է, որ Իսրայելը Գազայում «ծրագրված ցեղասպանություն է իրագործում, վարչապետ Նեթանյահուն, որպես պատերազմի հանցագործ, պետք կանգնի Միջազգային քրեական դատարանի առաջ», ավելացնելով. «Ցեղասպանության դատապարտումը «ՀԱՄԱՍ»-ին աջակցելու դրսեւորում չէ, այլ ժողովրդավարության հրամայական»:
Այդ ընթացքում, Պաղեստինյան ինքնավարության ղեկավար Մահմուդ Աբասից հետո, ի նշան հիվանդանոցի ռմբակոծման դեմ բողոքի, Հորդանանը եւս հրաժարվել է մասնակցել հոկտեմբերի 18-ին նախագահ Բայդենի գլխավորությամբ հրավիրվող քառակողմ հանդիպմանը: Գալով նախագահ Էրդողանին՝ թվում էր, թե նա սովորության համաձայն կհոխորտա մեծ տերությունների ղեկավարների վրա, սակայն հոդվածը գրի առնելու պահին նոյնիսկ չէր դատապարտել Իսրայելին: Բայց փոխարենը թուրքական ոստիկանությունը արցունքաբեր գազով ցրել է Ստամբուլում Իսրայելի գլխավոր հյուպատոսարանի առջեւ հավաքված ցուցարարներին:
Ամենայն հավանակությամբ Թուրքիայի նախկին վարչապետ, «Ապագա» կուսակցության նախագահ Ահմեդ Դավութօղլուն Էրդողանի դերն է գողացել՝ նա նախ դատապարտեց ցուցարարների դեմ արցունքաբեր գազ օգտագործելու ոստիկանության արարքը, ապա ասաց. «Թուրքիայից անհապաղ պետք վտարել Իսրայելի դիվանագիտական առաքելությունը: Ոչ ոք չի կարող կասեցնել հակաիսրայելական ցույցերը երկրում, հետաքրքրական է, թե ոստիկանությունը ո՞ւմ հրահանգով է արցունքաբեր գազ է օգտագործել ցուցարաների դեմ»: Դավութօղլուն, ինչ խոսք, անուղղակի Էրդողանին է ակնարկում, իսկ Թուրքիայի նախագահը զարմանալիորեն զսպվածություն է դրսեւորում եւ սահմանափակվում Գազայի համար եռօրյա ազգային սուգ հայտարարելով:
Էրդողանի զսպվածությունը, սակայն, չի խանգարել իսլամամետ «Yeni Akit» թերթին՝ հոկտեմբերի 18-ի համարում հրապարակելու «Քաղաքացիությունից զրկեք սիոնիզմի սպասավորներին» վերնագրով խմբագրականը, որտեղ մասնավորապես ասված է.
«Հոկտեմբերի 7-ին «ՀԱՄԱՍ»-ի կազմակերպած գործողությունից հետո, աշխարհի չորս ծայրից երկակի քաղաքացիություն կրող հայրենակիցներին պաղեստինցի սպանելու համար օկուպացիոն բանակի կազմում ներառող Իսրայելի հրամանին ենթարկված թուրքական անձնագրով սիոնիստները, ըստ թիվ 5901 օրենքի, պետք է զրկվեն թուրքական քաղաքացիությունից: Հրեաները, որտեղ էլ լինեն՝ համարվում են Իսրայելի բնածին քաղաքացիները: Ուստի նրանք գնում, ծառայում են իսրայելական բանակում: Քանի որ նրանք այդ բանակի կազմում, մասնակցելով ջարդերին, հանցագործություններ են կատարում, պետք է կանգնեն դատաստանի առջեւ: Մինչ անմեղ մահմեդականներին սպանելու նպատակով Ֆրանսիայից, Գերմանիայից, Անգլիայից, ԱՄՆ-ից, Կանադայից, Արգենտինայից, Բրազիլիայից Իսրայել հրավիրված հրեաները տեսախցիկների առջեւ հանդես են գալիս քարոզչական ելույթներով, Թուրքիայից մեկնողներն աշխատում են լուռ մնալ, որ տակից գործեն: Քանի որ Ստամբուլի, Իզմիրի պես խոշոր քաղաքներում բնակվող եւ թուրքական անձնագիր կրող հրեաները նույնպես Իսրայելի բնածին քաղաքացիների համարում ունեն, իրենք եւս սիրահոժար գնում եւ այնտեղ ծառայում են»:
Հ. ՉԱՔՐՅԱՆ
