Երեւանում այս օրերին անցկացվող «Ոսկե ծիրան» կինոփառատոնի շրջանակում փորձարկվեց նաեւ նոր ձեւաչափով նախագիծ, որը բոլորին հասկանալի մեկ՝ կինոյի լեզվով դիտողին ներկայացրեց 100-ամյա հայ կինոյի դրվագապատկերային փոխանցումը: «Գաֆեսճյան» կենտրոնում բացված եւ դեռեւս մի քանի օր գործող «Անցուդարձ» անունը կրող կինոցուցահանդես-նախագծում կինոօպերատոր Արեգ Կոզմոյանը հայ կինոյի 100 ֆիլմից ընտրված դրվագախաղով (պատկերի հետուառաջ խաղարկմամբ), բազմաթիվ էկրանային բացվածքներով միատեղ ներկայացնում է մեր կինոյի անցած ճանապարհը՝ կենդանի, շարժուն դրվագաշարերով հայկական կինոյի շունչը փոխանցելով: Ցուցադրությունն ուղեկցվում է հայկական կինոմեղեդիների կենդանի համադրությամբ՝ երաժիշտ Վան Սարկիսյանի մշակումներով եւ իմպրովիզացիայով:
Հուլիսի 12-ին «Գաֆեսճյան» կենտրոնում բացված ցուցահանդես-դրվագապատումի բացմանը փառատոնի գործադիր ղեկավար Կարեն Ավետիսյանը մատնանշեց ձեւաչափի բովանդակային ուղղվածությունը՝ երկխոսությունն արվեստի այլ տեսակների հետ, ինչպես նաեւ հարյուրամյա ժառանգության հետ նոր լեզվով (թեկուզ նման ցուցահանդեսների ձեւաչափով) կապի պահպանումը: Ազգային կինոկենտրոնի տնօրեն Շուշանիկ Միրզախանյանը եւս կարեւորեց նոր ձեւաչափը, իսկ Արեգ Կոզմոյանն ինքը մասնավորեցրեց, որ ամեն տասնամյակից վերցրել է տասը ֆիլմ եւ ներկայացրել դրվագաշարով (գիֆերով): Ի դեպ՝ նա արդեն հայ կինոյի թեմաներով դրվագաշարեր (գիֆեր՝ շարժուն եւ կրկնվող պարկերների շարք) ստեղծում է արդեն տարիներ, դա կարելի է եւ գովազդ ընկալել, եւ ֆիլմի մի քանի վայրկյանանոց հայտ-պատմություն, այցեքարտ, որը կարելի է նաեւ այլ երկրներում ներկայացնել՝ պատմելով հայկական կինոյի մասին:
Մ.Խ.
