Մանկավարժական համալսարանը վերջնական դիրքորոշում չի հայտնում, Ֆիզիկական կուլտուրայի ու սպորտի համալսարանը դեմ է բուհերի միավորմանը, Բրյուսովի անվան լեզվաբանական համալսարանի ուսանողներն էլ դասադուլ են սկսել:
Հոկտեմբերի 12-ին հայտնի դարձավ, որ բուհերի խոշորացման կառավարության ծրագրով՝ Բրյուսովի անվան պետական համալսարանը պետք է միանա Հայաստանի ֆիզիկական կուլտուրայի եւ սպորտի պետական ինստիտուտի ու Մանկավարժական համալսարանի հետ:
Հայտնի չէ, թե ինչ խնդիր կլուծի բուհերի խոշորացման ծրագիրը եւ ինչ կտա կրթության բնագավառին:
«Ինչ ուզում է լինի չենք պատրաստվում դուրս գալ մեր համալսարանից: Երեք տարի առաջ մեծ դժվարությամբ եմ ընդունվել Բրյուսով »õ չեմ պատրաստվում հաջորդ տարի ստանալ Մանկավարժական համալսարանի դիպլոմ»,- մեզ հետ զրույցում ասում է Բրյուսովի անվան պետական համալսարանի ուսանողուհի Վարդուհին:
Բուհի դասախոսներից՝ «ԱրմՔոմեդի» ծրագրի հաղորդավար Նարեկ Մարգարյանն իր ինստագրամյան էջում հրապարակում է արել, որում նշել է. «Եթե պետությունը իսկապես նպատակ ունի գիտությունը զարգացնել, ապա Բրյուսովի պես կայացած կրթօջախներին պետք է աչքի լույսի պես նայի ու դեռ մի բան էլ լայնացնի ինքնավարումն ու շատացնի ֆինանսավորումը: Իսկ եթե նպատակ կա ուղղակի հաշվապահական կրճատումներ անել բյուջեում, ապա կարող է դա անել իր միլիարդավոր պարգեւավճարների հաշվին եւ հանգիստ թողնի կրթությունը»:
Ցույցի մասնակից ուսանողները կոչ են անում միանալ իրենց՝ համարելով, որ դա միայն Բրյուսովի համալսարանի խնդիրը չէ: Ցույցերից մեկի ընթացքում քաղաքագիտության բաժնի ուսանող Էդգար Զատիկյանն իր խոսքում նշեց, որ իրենք պայքարում են ոչ միայն Բրյուսովի, այլեւ Մանկավարժականի, Ֆիզկուլտուրայի ինստիտուտի ու մյուս բուհերի համար:
Խնդրի վերաբերյալ իր կարծիքը հայտնել նաեւ Բուհի Սոցիալական գիտությունների եւ սերվիսի ֆակուլտետի դեկանը, որն իր էջում գրել է՝ միացման արդյունքում նոր կառուցվածքի եւ նոր հավաքացուցակի հաստատմամբ հնարավոր են հաստիքների կրճատումներ, մասնավորապես վարչական եւ ուսումնաօժանդակ. «Հետո էլ ասում եք ընդամենը երկու ռեկտորի հարց է…»,- գրել է Ցոլակ Ակոպյանը:
Բուհերի խոշորացման ծրագիրը դժգոհություն է առաջացրել նաեւ Մանկավարժական համալսարանի ուսանողների շրջանում. «Համալսարանների խոշորացման ծրագիրը կարող է հանգեցնել հետագայում դիմորդների թվի նվազեցման ու աշխատատեղերի կրճատման, կարող ենք ենթադրել, որ ապագայում կունենանք պետք եղածից ավելի մեծ թվով լեզվաբաններ ու ֆիզկուլտուրայի մարզված ուսուցիչներ»,- ասում է Մանկավարժական համալսարանի Կուլտուրայի ֆակուլտետի մագիստրատուրայի ուսանողուհին:
Կրթության, գիտության, մշակույթի եւ սպորտի նախարար Վահրամ Դումանյանը կառավարությունում լրագրողների հետ զզրույցում՝ դիմելով ուսանողներին ու դասախոսներին՝ ասել է, թե ոչինչ կտրուկ չի փոխվելու:
«Այս ամենը կրթության որակի բարձրացման միտում ունի, որեւիցե բան չի փակվում, որեւիցե հաստիք չի կրճատվում, միգուցե, երկու ռեկտորի հաստիք պակաս ունենանք», – նշեց նախարարը:
Այսպիսով մնում է պարզել, թե ինչպե՞ս է ծրագիրը լավացնելու կրթության մակարդակն ու որակը, ինչպե՞ս է այն ավելի լավ մասնագետներ պատրաստելու եւ արդյոք ծրագիրը կօգնի՞, որ մի քանի տարի անց դպրոցներում մանկավարժներ ընտրվեն ատեստավորման, այլ ոչ թե տառերի իմացության սկզբունքով:
ՀԱՍՄԻԿ ՄԽԻԹԱՐՅԱՆ
