Ըստ Անկարայից «Ալ-Մոնիտորի» հաղորդած տեղեկության, Թուրքիայի արտգործնախարար Մեվլութ Չավուշօղլուն հայտարարել է, որ Եգիպտոսի արտգործնախարար Սամեհ Շուքրին իր երկիրն է այցելելու մոտերս, որպեսզի վերահաստատվեն Եգիպտոսի եւ Թուրքիայի միջեւ դիվանագիտական հարաբերությունները, որոնք խզվել էին 2013-ին: Չավուշօղլուն ուղիղ եթերում ելույթ ունենալով խիստ հավանական է համարել իր գործընկերոջ այցելության ընթացքում վերականգնել դեսպանների առկայությունը երկու երկրներում: Սակայն նա զգուշացել է հայտարարել, թե նախքան մայիսի 14-ը որեւէ հանդիպում տեղի կունենա նախագահներ Ռեջեփ Թայիփ Էրդողանի եւ Աբդել Ֆաթթահ էլ-Սիսիի միջեւ:
Եգիպտոսը ամենամեծ մարտահրավերն էր, գրում է լրագրող Էզգի Աքընը, նետված Թուրքիայի առաջ, երբ երկու տարի առաջ Անկարան նախաձեռնեց բարելավել հարաբերությունները տարածաշրջանային արաբական երկրների հետ, որպեսզի դուրս գա մեկուսացումից: Երկու երկրների միջեւ հարաբերությունները վատացել էին, երբ 2013-ի հեղաշրջումը տապալեց Եգիպտոսում «մահմեդական եղբայրների» իշխանությունը, ի հեճուկս Էրդողանի, որ բացի դրանից Լիբիայի հարցով էլ տարաձայնություններ ուներ Կահիրեի հետ:
Թուրքիան նախ Իսրայելի, Սաուդյան Արաբիայի եւ Արաբական Միացյալ Էմիրությունների հետ փորձեց հարաբերությունները կարգավորել, մինչ Եգիպտոսի հետ կապը երկար ժամանակ մնում էր զուտ տեխնիկական մակարդարկի վրա: Միայն անցյալ տարի Քաթարում անցկացված FIFA-ի աշխարհի առաջնության մրցույթների ժամանակ շատ կարճ հանդիպում կայացավ Էրդողանի եւ էլ-Սիսիի միջեւ: Փետրվարի 6-ի երկրաշարժերը, որոնք ավելի քան 50 հազար մարդու կյանք խլեցին եւ երկու երկրներում տիրող տնտեսական մարտահրավերները առիթ հանդիսացան, որ վերանայվեն հարաբերությունները եւ արտգործնախարար Սամեհ Շուքրին այցելի Թուրքիա առաջին անգամ 2016-ից ի վեր: Նրա Թուրքիա այցելությունից առաջ Չավուշօղլուն էր Կահիրե այցելել անցյալ ամիս, դառնալով Թուրքիայի առաջին արտգործնախարարը, որ Եգիպտոս է այցելում 2012-ից հետո:
Մյուս կողմից, Ռուսաստանի միջնորդությամբ Անկարան փորձում է նաեւ հարաբերությունները բարելավել Սիրիայի հետ: Մոտ մեկ տասնամյակ ձգվող թշնամանքից հետո, անցյալ դեկտեմբերին, Ռուսաստանի, Սիրիայի եւ Թուրքիայի պաշտպանության եւ հետախուզության առաջնորդները Մոսկվայում հանդիպեցին իրար: Հետագայում եռյակին միացան նաեւ Իրանի համապատասխան մարմինների ներկայացուցիչները: Հայտնի է, որ Անկարան ռազմական եւ քաղաքական օժանդակություն է ցուցաբերում Սիրիայի սուննի ապստամբներին, որպեսզի տապալեն Բաշար էլ-Ասադի կառավարությունը: Ռուսաստանն ու Իրանը պաշտպանում են Դամասկոսին: Քառակողմ ձեւաչափով, բայց փոխարտգործնախարարների մակարդակով վերջին հանդիպումը այս ամսվա սկզբներին կայացավ, եւ ըստ Չավուշօղլուի՝ հաջորդ հանդիպումը կկայանա մայիսի սկզբներին դարձյալ Մոսկվայում:
Թուրքիան Դամասկոսից համագործակցություն է ակնկալում Սիրիայի քուրդ միավորումների դեմ իր պայքարում: Նաեւ ակնկալում է, որ Թուրքիայում ապրող մոտ 4,5 միլիոն սիրիացի փախստականները վերադառնան իրենց երկիրը: Չնայած Չավուշօղլուն բացառում է կապը առաջիկա ընտրությունների եւ Անկարա-Դամասկոս հարաբերությունների մերձեցման միջեւ, սակայն պարզ է, որ սիրիացիների այդ մեծ քանակի ներկայությունը լուրջ մարտահրավեր է 65 միլիոն ներառող ընտրազանգվածի համար, գրում է լրագրողը:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
