ՀՀ էներգետիկ անվտանգության, վառելիքաէներգետիկ ռեսուրսների խնայողության համար կարեւոր նշանակություն ունի էներգետիկայի ոլորտի բարձր որակավորման մասնագետների պատրաստումը: Այս տեսակետից մեծ աշխատանքներ են կատարվում Երեւանի տարածաշրջանային թիվ 2 պետական քոլեջում (տնօրենի պարտականությունները կատարող՝ Ն. Հովհաննիսյան): Բազմաթիվ ակադեմիաների իսկական անդամ, Ռուսաստանի բնագիտության ակադեմիայի պրոֆեսոր, «Ազգ»-ի երկարամյա աշխատակից Ստեփան Պապիկյանը հսկայական ջանքեր է գործադրում ուսանողների գիտելիքները բազմակողմանի զարգացնելու եւ իր հարուստ փորձն ու հմտությունները նրանց փոխանցելու համար:
Վերջերս քոլեջի «Վերականգնող էներգիայի էներգետիկ կայանների մոնտաժում, նորոգում եւ սպասարկում» մասնագիտության 2-րդ եւ 3-րդ կուրսերի ուսանողները, դասախոսներ Ս. Պապիկյանի եւ Ն. Հայրապետյանի ղեկավարությամբ այցելեցին Երեւանի-1 հիդրոէլեկտրակայան:
Ուսանողները ծանոթացան հիդրոէլեկտրակայանի աշխատանքի հետ: Ծանոթացան ՀԷԿ-ի առանձին հանգույցների՝ գեներատոր, հիդրոագրեգատ, տրանսֆորմատոր օժանդակ տնտեսություն, բարձրավոլտ էլեկտրահաղորդման գիծ եւ այլն: Գործնականում ուսանողները հնարավորություն ունեցան հարստացնել իրենց տեսական գիտելիքները:
Շատ ուրախալի է, որ քոլեջի ուսանողները պրոֆեսոր Ս.Պապիկյանի գլխավորությամբ էներգետիկայի ոլորտի դասախոսությունները անցկացնում են արտադրությունում՝ Երեւանի ՀԷԿ-1-ում, ինչը ուսանողներին հնարավորություն է ընձեռում տեղում, առավել խորը ծանոթանալու ոլորտի խնդիրներին եւ ստանալու բազմակողմանի գիտելիք: Հուսով ենք նման գործնական դասերը շարունակական կլինեն: Հարկ է նշել նաեւ, որ ներկայում Ս. Պապիկյանը դասախոսական աշխատանք է կատարում նաեւ Հայ-Ռուսական Սլավոնական համալսարանում: Մագիստրոսական թեզերի գիտական ղեկավար է:
