Հայաստանում գիտության եւ տեխնիկայի զարգացումը կարեւոր նշանակություն ունի տնտեսության հետագա բարգավաճման համար: ՀՀ-ի պետական բյուջեի հաշվին կատարվող շատ գիտական աշխատանքների արդյունքները հրատարակվում են ոչ միայն տեղական, այլ նաեւ արտասահմանյան հեղինակավոր գիտական պարբերականներում, ինչը անչափ կարեւոր է: Սակայն կան որոշ նրբություններ, որոնք անհրաժեշտ է հաշվի առնել հետագա աշխատանքների համար: Կարծում եմ՝ ճիշտ կլիներ, որպեսզի մի շարք ռազմավարական բնույթի գիտական աշխատանքներ հասկանալի պատճառներով շուրջ 10 տարով գաղտնիացվեին: Օրինակ` միջուկային ֆիզիկա, էներգետիկ անվտանգության հարցեր եւ այլն: Ստացվում է, որ առաջնակարգ գիտական մտքերը ափսեի վրա օրը ցերեկով ներկայացնում ենք միջազգային գիտական հանրությանը:
Ո՞րն է մեր ազգային շահը: Այս մասին անհրաժեշտ է խորհել եւ շատ զգույշ լինել: Կարելի է մի շարք դեպքերում որոշ թեկնածուական եւ դոկտորական ատենախոսություններ, որոնք պարունակում են կարեւոր տեղեկություններ մեր պետության մասին, պաշտպանել փակ ձեւաչափով: Արդյունքում կշահենք ազգովին:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
