Գիտնականների պրպտումները շարունակվում են

ՀՀ Գիտությունների ազգային ակադեմիայի Ա. Թախտաջյանի անվան բուսաբանության ինստիտուտի գիտնականները բացահայտել են, որ Հայաստան ներմուծված ծառաբույսերն ավելի քան երեք անգամ գերազանցում են աբորիգեն ծառաբույսերին:

Երեւանի բուսաբանական այգին հիմնադրվել է 1935 թ.: Տարածքը` 80 հեկտար է: Հայաստանի աբորիգեն ծառաբույսերը ներկայացնում են 54 ընտանիքի 117 ցեղի 346 տեսակ, իսկ ներմուծվածները՝ 66 ընտանիքի 193 ցեղի շուրջ 1600 տեսակ եւ տարատեսակ:

Երեւանի կիսաանապատային գոտում գտնվող այգում ստեղծված հարուստ ու բազմազան բուսական հավաքածուները ծառայում են որպես ուսումնական բազա կրթական հաստատությունների, առաջին հերթին ԲՈՒՀ-երի ուսանողների համար: Այգին հանդիսանում է նաեւ յուրահատուկ ռեկրեացիոն օջախ:

Այստեղ ներկայացված են նաեւ մի շարք հազվագյուտ եւ անհետացող բուսատեսակներ (մոտ 70 տեսակ, որոնցից 38 ներառվել են ՀՀ Կարմիր գրքի նոր հրատարակության մեջ):

Ներմուծված եւ կլիմայավարժեցված տեսակների վարքագծի վերլուծության հիման վրա գիտնականները կանխատեսել են, որ կանոնավոր եւ նպատակաուղղված ներմուծման արդյունքում 25-30 տարի անց Հայաստանի բուսաբանական այգիներում օտարածին դենդրոֆլորան ներկայացված կլինի շուրջ 2000 տեսակով եւ տարատեսակներով: Նրանց կազմում մեծ թիվ կկազմեն պարտիզային ձեւերը:

Գեղեցիկ ծաղկող թփատեսակների ներմուծմամբ եւ ցեղային կոմպլեքսի սկզբունքով հավաքածու ստեղծելով՝ հնարավոր կլինի հիմնել երկարատեւ ծաղկող այգի: Այն շատ կարեւոր է կիսաանապատային կլիմայական պայմաններում գտնվող Երեւանի համար: Ներմուծման եւ կլիմայավարժեցման աշխատանքների շնորհիվ Երեւանի բուսաբանական այգում պարտիզային ձեւերի թիվն ավելացել է 14 նոր ձեւերով:
«Ներկայում Երեւանի բուսաբանական այգում այդ հավաքածուն ընդգրկում է 63 անուն պարտիզային ձեւ: Մերկասերմերը ներկայացված են 19 անուն պարտիզային ձեւով, իսկ ծածկասերմերը՝ 44: Կատարվել են Արալիազգիների (Araliaceae) ընտանիքի՝ 4 ցեղի, 4 տեսակի (Eleutherococus senticocus, Acanthopanax sessiliflorus, Kalopanax septemlobus, Aralia mandshurica) աճման, զարգացման եւ հարմարվողականության ուսումնասիրություններ»,- նշեց Ժ. Վարդանյանը:

Ուսումնասիրություններն իրականացվել են ՀՀ ԳԱԱ Ա. Թախտաջյանի անվան ինստիտուտի բազային ֆինանսավորման շրջանակներում:

ՍՏԵՓԱՆ ՊԱՊԻԿՅԱՆ