Ուռուցքային հիվանդությունների բուժման համար ՀՀ ԳԱԱ Լեւոն Օրբելու անվան ֆիզիոլոգիայի ինստիտուտում կատարվում են Macrovipera lebetina obtusa թույնի եւ ցլի ենթաստամոքսային գեղձի ֆոսֆոլիպազ A2-ի ու ֆոսֆորային դենդրիմերների, ֆոսֆոր պարունակող ամֆիֆիլային դենդրոնների եւ արծաթե նանոմասնիկների փոխազդեցության բացահայտման համեմատական հետազոտություններ: Ֆոսֆորային դենդրիմերները, ֆոսֆոր պարունակող ամֆիֆիլային դենդրոնները եւ արծաթե նանոմասնիկները ժամանակակից ուռուցքաբանության համար ակտիվ մշակվող նանոմասնիկներ են: Դրանց փոխազդեցության բացահայտումը կենսաբանորեն ակտիվ միացությունների հետ չափազանց կարեւոր է թիրախային դեղորայքի տեղափոխման ընթացքում տեղի ունեցող պրոցեսների խորքային մեխանիզմների պարզաբանման համար:
Գիտնականների ուսումնասիրությունները ցույց են տվել, որ օձի թույնի ակտիվ բաղադրամասերը կարող են ունենալ դրական ազդեցություն ինչպես արագ զարգացող քաղցկեղների տարբեր տիպերի, այնպես էլ բազմաթիվ այլ (մասնավորապես՝ բորբոքային) հիվանդությունների կասեցման գործում: Գնահատվել է թույնի բաղադրիչների սիներգիկ փոխազդեցության աստիճանը, այդ թվում՝ նաեւ նորագույն սերնդի նանոմասնիկների հետ փոխազդեցության ժամանակ:
Հետազոտությունն իրականացվում է ՀՀ ԳԱԱ Օրբելու անվան ֆիզիոլոգիայի ինստիտուտի Թունաբանական հետազոտությունների լաբորատորիայի բազային ֆինանսավորմամբ, ինչպես նաեւ ՀՀ ԿԳՄՍՆ Բարձրագույն կրթության եւ գիտության կոմիտեի դրամաշնորհային ծրագրերի շրջանակներում:
ՍՏԵՓԱՆ ՊԱՊԻԿՅԱՆ
