Վանաձորում պարեկային ոստիկանության աշխատակիցներն այնպես են ծեծել անչափահաս տղային, որ նա ընդհուպ կոմայի մեջ է ընկել: Այժմ, փառք Աստծո, ապաքինվում է: Երիտասարդին ոստիկանների ծանր հարվածներից պաշտպանել հորեղբայրն է փորձել, բայց «նորացված» ուժայինների մահակը նաեւ նրան է բաժին հասել: Մեկ օրում, փաստորեն, ոտիկանության ծառայակիցների՝ «հասարակական կարգը» հսկելու շրջանակներում Հայաստանի Հանարապետության երկու քաղաքացի (որոնց, ի դեպ, 2018-ին Նիկոլ Փաշինյանը «հպարտ ու արժանապատիվ» էր անվանում) դաժան ծեծվել ու հիվանդանոց են ընկել:
Դեպքից ուղիղ մեկ շաբաթ է անցել, բայց մինչեւ այս պահը չի պարզվել՝ ի վերջո ոստիկաններն ինչո՞ւ են առանձնակի դաժանությամբ գործել: Պատասխանատվության կանչելու կամ մեղավորներին գտնելու մասով վարույթ հարուցելու մասին խոսելն, իհարկե, ավելորդ է՝ «օրենքի մարդը» միշտ ճիշտ է խեղված տրամաբանությունից ելնելով:
Ըստ տուժածների՝ պարեկային ծառայության աշխատակիցների հետ վեճն այն բանից հետո է ծագել, երբ վարչապետ Նիկոլ Փաշինյանի ավտոշարասայան համար ճանապարհն ամեն գնով ազատել են փորձել՝ անչափահաս երիտասարդն ու նրա հորեղբայրը ոստիկաններին իրենց հետ քաղաքավարի խոսելու ու վարվելու հորդոր են տվել: Պարեկային ծառայության ներկայացուցիչները սակայն նախընտրել են ոտուձեռքով խոսել, ինչի հետեւանքը, փաստորեն, մարմնական տարբեր աստիճանների վնասվածքներն ու անչափահասի՝ կոմայի մեջ ընկնելն է եղել:
2018-ի քաղաքական վերադասավորումներից հետո վարչապետ Նիկոլ Փաշինյանն ու նրա թիմակիցները մեկ անգամ չէ, որ խոսել են «նախկիններից մնացած» ոստիկանների բարեփոխման անհրաժեշտության մասին: Ոստիկական համակարգն, այո, բարեփոխման կարիք ուներ, ու պարեկային ծառայություն ներդնելուց հետո բոլորը կարծում էին, թե «նորացված» ոստիկաններն ամբողջապես կտարբերվեն նախորդներից: Բայց, փաստորեն, նրանք բացի արտաքին համեզգեստի փոփոխությունից որեւէ այլ փոփոխություն չեն ունեցել: Փաշինյանի իշխանությունը, ոստիկանական համակարգի բարեփոխումը, փաստորեն, ավելի լավ ծեծելու համար էր իրականացնում: Չնայած՝ ավելին չէր էլ կարելի սպասել մի «բարեփոխումից», որտեղ ուժային կառույցներին բնորոշ ու ամբողջ աշխարհում գործող չափորոշիչները չէին գործելու. պարեկ դառնալու համար ո՛չ հասակի, ո՛չ քաշի, ո՛չ, առավել եւս, բարձրագույն կրթության չափորոիշները պարտադիր չեն:
Եթե անգամ ընդունենք ու պատկերացնենք, որ անչափահասն ու նրա հորեղբայրը սադրել են, վիրավորել կամ հայհոյել են ոստիկաներին, ապա դա չի նշանակում, թե պարեկային ծառայության աշխատակիցները ծեծուջարդով պետք է հարցեր լուծեին, քանի որ մեր սահմանադրությունն ու օրենքները, կարծես թե, ենթադրում են, որ Հայաստանում հարցերը ոչ թե բռունցքով, այլ օրենքով են լուծվում:
Հուսալ, թե վերոնշյալ դեպքը համակողամնի քննություն կանցնի, մեղավորներն էլ արադարցի պատիժ կկրեն, իհարկե միմատություն է, քանի որ նորից Փաշինյանի համար ճանապարհ բացող ոստիկանների ու ուժայինների աչքի առջեւ վարչապետին տեղափոխող ավտոշարասյան կողմից վթարի ենթարկված հղի կնոջ մահվանից հետո առ այսօր որեւէ մեկը ոչ միայն պատասխանատվության չի կանչվել, այլեւ գործով միակ մեղադրյալն էլ ազատության մեջ է:
ՍԵՎԱԿ ՎԱՐԴՈՒՄՅԱՆ
