Բրյուսելյան հերթական հանդիպումից հետո թե՛ Հայաստանում, թե՛ Արցախում քննարկում ու վերլուծում են՝ ի՞նչ կարող էր նշանակել կամ ենթադրել Եվրոպական խորհրդի նախագահ Շառլ Միշելի այն հայտարարությունը, թե Հայաստանն ու Ադրբեջանը ճանաչում են միմյանց տարածքային ամբողջականությունը՝ հիմք ընդունելով Ալմա-Աթայի հռչակագիրը: Եվրոպական խորհրդի նախագահը տարածքային ամբողջականությունը կոնկրետ թվերով էր հստակեցրել՝ ընդգծելով, որ խոսքը Հայաստանի 29.800 եւ Ադրբեջանի 86.600 քառակուսի կիլոմետրերի մասին է: Թեեւ Միշելը չէր պարզաբանել՝ «86.600»-ի մեջ մտնո՞ւմ է Արցախի Հանրապետությունը, թե՞ ոչ, բայց Հայաստանում ու Արցախում արդեն իսկ ահազանգում են՝ այդ թիվն Արցախի շահերից չի բխում:
Արցախի քաղաքական ուժերն անդրադարձել են Միշելի հայտարարությանն ու ընդգծել՝միջազգային որեւէ կառույց կամ անհատ, իր քմահաճույքից ելնելով, չի կարող որոշել ավելի քան 120 հազար հայի ճակատագիրը: «Դա որոշողը մենք՝ արցախահայերս պետք է լինենք: Եվ եթե, իսկապես, այդ մարդիկ ժողովրդավար արժեքներով են առաջնորդվում, ապա չպետք է ոտնահարեն այն ու տուրք տան Բաքվի ցանկություններին»,- «Ազգ»-ի հետ զրույցում ասաց Արցախի նախագահի խորհրդական, ԱՀ արտաքին գործերի նախկին նախարար Դավիթ Բաբայանը:
Մեր այն հարցին, թե Շառլ Միշելը ծանոթացե՞լ է արդյոք Ստեփանակերտից հնչած հակընդդեմ հայտարարությանը կամ եթե անգամ ծանոթացել է, դա նրան հուզելո՞ւ է, Բաբայանն այսպես արձագանքեց. «Չեմ կարծում, թե նա ծանոթացել է արցախյան քաղաքական ուժերի հայտարարությանը, բայց դա չի նշանակում, որ կարելի է հաշվի չնստել մեր տեսակետի հետ: Մենք ձեռքներս ծալած նստել չենք պատրաստվում, ամենատարբեր բարդ իրավիճակից ելքեր գտել ենք, հիմա էլ կգտնենք»:
ՍԵՎԱԿ ՎԱՐԴՈՒՄՅԱՆ
