Ռուսական աճուրդներում մեծ պահանջարկ ունեն հայ մեծ նկարիչ Մարտիրոս Սարյանի աշխատանքները: Մայիսի 13-ին կայացած «Լիտֆոնդ» աճուրդի տան թիվ 485 աճուրդում ներկայացված էին մի շարք հայտնի նկարիչների, այդ թվում՝ Պիեռ-Օգյուստ Ռենուարի, Ալեքսանդր Բենուայի, Պյոտր Կոնչալովսկու, Մարտիրոս Սարյանի, Բորիս Կուստոդիեւի, Զինաիդա Սերեբրյակովայի, Կոնստանտին Կորովինի, Օսիպ Ցադկինի, Ռոբերտ Ֆալկի, Անատոլի Զվերեւի, Վահրիճ Բախչանյանի եւ այլոց գործերը: Ամենամեծ պահանջարկ ունեցող լոտերից մեկը Սարյանի «Լեռնային գագաթներ» (1947) կտավն էր: Այն արված է տեմպերայով եւ յուղաներկով, չափսերով մեծ չէ՝ 18,4X33,7, կրում է հեղինակի ստորագրությունը ռուսերենով: Հետեւի կողմում հետեւյալ մակագրությունն է. «Հիշատակ Էմիլ Բրագինսկուն. Մ. Սարյան / 1947.1.ղ»: Նկարը պահվել է ռուս նշանավոր կինոդրամատուրգ Էմիլ Բրագինսկու (1921-1998) հավաքածուում: 1946-1951 թթ. նա թղթակցել է «Օգոնյոկ» ամսագրին, գրել ակնարկներ սիրելի նկարիչների մասին: Ենթադրվում է, որ Սարյանն այս բնանկարը 1947 թ. նվիրել է սկսնակ գրողին:
Դեռ մինչեւ աճուրդի մեկնարկը նախնական առցանց դրույքներն արագորեն աճում էին, եւ ի վերջո կտավը վաճառվեց 38.860 ԱՄՆ դոլարին համարժեք գումարով՝ դառնալով աճուրդի ամենաթանկ լոտը:
Առաջին անգամը չէ, որ Սարյանի նույնիսկ երկրորդական, ոչ հայտնի աշխատանքներն այսպիսի բարձր գնով են վաճառվում Ռուսաստանում. 2021 թ. սեպտեմբերին «յուedՅՈւquareAuction» աճուրդի տունը շուրջ 38.400 դոլարով վաճառեց Սարյանի մեկ այլ՝ «Երեւանյան բակ» (1944) կտավը, որը եւս այն ժամանակ առաջատար լոտերի եռյակում էր:
ԱՇՈՏ ԳՐԻԳՈՐՅԱՆ
Լուսանկարում՝ Մ. Սարյան, «Լեռնային գագաթներ» (1947)
