Ներկայիս բարդ աշխարհաքաղաքական պայմաններում մեծ դեր եւ նշանակություն ունի Հայաստան-Արցախ գիտական կապերի ամրապնդումը: Վերջերս ՀՀ Գիտությունների ազգային ակադեմիայի Արվեստի ինստիտուտը եւ Շուշիի տեխնոլոգիական համալսարանը կնքեցին համագործակցության համաձայնագիր: Նախատեսվում է համատեղ մշակել եւ իրականացնել փոխշահավետ գիտակրթական ծրագրեր, պրոֆեսորադասախոսական անձնակազմի եւ փորձագետների փոխանակում, համատեղ հետազոտություններ եւ գիտական միջոցառումներ, հրապարակել գիտական հոդվածներ:
Հարկ է նշել,որ համալսարանն ստեղծվել է 2015 թվականին, Լեռնային Ղարաբաղի կառավարության 28 դեկտեմբերի 2015 թ N911-Ն որոշմամբ: 2016 թ. ապրիլի 14-ին Կազանում տեղի ունեցած շինարարական բուհերի միջազգային ասոցիացիայի վարչության որոշմամբ Շուշիի տեխնոլոգիական համալսարանը ընտրվեց Շինարարական բուհերի միջազգային ասոցիացիայի անդամ:
ՀՀ ԳԱԱ Հայագիտության եւ հասարակական գիտությունների բաժանմունքի ակադեմիկոս քարտուղար, ակադեմիկոս Յուրի Սուվարյանը նշեց, որ բաժանմունքը կաջակցի համաձայնագրի դրույթների իրականացմանը:
«Այսօր Արցախի հանդեպ տեղի է ունենում անարդարություն: Շուշին միշտ եղել է հայաշատ բնակչությամբ: Մինչ 1920 թվականը, ամբողջ 18-19-րդ դարերին հայկական տարածքում գործող մշակութային խոշոր կենտրոնը Շուշին էր: Այսօր բոլորս պետք է մասնակից լինենք եւ մեր ավանդն ունենանք, որպեսզի պատմական անարդարությունը շտկվի: Մեզ գործնական քայլեր են պետք՝ Արցախը հզորացնելու համար: Ողջունում եմ այս նախաձեռնությունը, իսկ Արցախին մաղթում եմ անկախ կարգավիճակի նվաճում», – ասաց ակադեմիկոս Յուրի Սուվարյանը:
«Մենք շատ ուրախ ենք այս համագործակցության համար: Վստահ եմ՝ մեր համագործակցությունը կլինի բազմակողմանի եւ բազմաշերտ: Կարծում եմ, որ այս համաձայնագրի ստորագրումից հետո կծնվեն նոր մտքեր, նոր գաղափարներ: Ուզում եմ նշել, որ Արվեստի ինստիտուտն Արցախի կողքին է, եւ ինչով կարող ենք, օգտակար կլինենք ձեզ»,- ասաց ՀՀ ԳԱԱ Արվեստի ինստիտուտի տնօրեն Աննա Ասատրյանը:
Ուրախալի է, որ զարգանում է Հայաստան-Արցախ գիտական համագործակցությունը:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
