«Մարդ Աստծո» գրական մրցանակաբաշխությունը՝ Հայաստանի Գրողների միության անդամների համար, հայտարարվել էր «Մեծն Ներսես» բարեսիրական կազմակերպության գործունեության 30-ամյակի շրջանակներում ՀՀ Գրողների միության եւ «Մեծն Ներսես» կազմակերպության կողմից: Նպատակն էր՝ օժանդակելու հայ գրողին, խթանելու ժամանակակից հայ գրականության բնականոն ընթացքը, հայ ընթերցողին ներկայացնելու լավագույն գրական ստեղծագործություններ: Հունիսի 28-ին Գրողների միության կլոր սրահում կայացած հանդիսությանն ամփոփվեցին մրցանակաբաշխության արդյունքները: Մրցույթին ներկայացած արձակագիրների, բանաստեղծների եւ մանկագիրների գրականությունը գնահատել էր գրականագետներից կազմված խիստ եւ անաչառ հանձնախումբը: Բանասիրական գիտությունների դոկտոր, պրոֆեսոր Սուրեն Դանիելյանը ներկայացրեց 43 հեղինակների ստեղծագործությունները քննելիս իր գլխավորած հանձնախմբի գործելակերպի սկզբունքները, այն է՝ լինել պատասխանատու սեփական խղճի առաջ եւ անկանխակալ, ելնել մրցանակաբաշխության նախապայմաններից: Գրողները հանդես էին եկել կեղծանուններով, ինչը նույնպես նպաստել էր արդարացի որոշումների ընդունմանը: «Մեր աչքի առաջ տեղի է ունեցել գրական աշխարհի սերնդափոխություն»,- նկատեց Ս. Դանիելյանը:
«Ձեր գերագույն նպատակը վսեմը, գեղեցիկը միշտ ներկայացնելն է եւ մարդոց մտքերը, հոգիներն ազնվացնելը, եւ ըստ այդմ՝ Աստծո պատկերը մարդ արարածին վերստին դարձնելը»,- իր խոսքում նշեց Անուշավան եպս. Դանիելյանը:
Պոեզիայի ասպարեզում առաջին մրցանակը շնորհվեց Խաչիկ Մանուկյանին, երկրորդը՝ Անդրանիկ Կարապետյանին, երրորդը՝ Հասմիկ Սարգսյանին:
Հանձնախումբը որոշել էր արձակի ասպարեզում առաջին մրցանակ ոչ ոքի չշնորհել: 2-ական երկրորդ եւ երրորդ մրցանակները, համապատասխանաբար, տրվեցին Գրիգոր Ջանիկյանին, Նանեին, Կարինե Ռաֆայելյանին, Վրեժ Սարուխանյանին:
Մանկապատանեկան գրականության առաջին մրցանակը շնորհվեց Սաթենիկ Ղազարյանին, երկրորդը՝ Ալիս Հովհաննիսյանին, երրորդը՝ Զավեն Պետրոսյանին:
Խրախուսական մրցանակներ շնորհվեցին Գոհար Գալստյանին, Ալվարդ Հովսեփյանին եւ Օլգա Դարյանին:
Հուրախություն միության անդամների, ՀԳՄ նախագահ Էդ. Միլիտոնյանը հայտնեց «Մարդ Աստծո» գրական մրցանակաբաշխությունն ամենամյա դարձնելու որոշման մասին:
Խմբ. կողմից ջերմորեն շնորհավորում ենք բոլոր մրցանակակիրներին, այդ թվում՝ մեր թերթի հեղինակներից Հասմիկ Սարգսյանին, ինչպես նաեւ մրցանակաբաշխության կազմակերպիչ «Մեծն Ներսես» բարեսիրական կազմակերպությանը եւ Հայաստանի գրողների միությանը:
